Umfjöllun: Fall er fararheill

Völsungur hóf keppni í 1.deild karla í dag þegar BÍ/Bolungarvík kom í heimsókn til Húsavíkur. Völsungur lék síðast í 1.deild árið 2005 og því mikil spenna í fólki fyrir komandi sumri. Það var um 5 gráðu hiti og smá vindur þegar Jan Eric flautaði leikinn á og mætingin á völlinn með ágætum.

Byrjunarlið Völsungs: Dejan Pesic, Sveinbjörn Már, Odrobéna, Marko, Sigvaldi, Halldór Orri, Pétur Kling, Guðmundur Óli, Hafþór Mar, Hrannar Björn (f) og Dejan Bozicic.

Á bekknum sátu; Kjartan Páll, Halldór Fannar, Ásgeir, Sindri, Eyþór, Halldór Kára og Bjarki Freyr. Gunni Siggi var í banni í þessum fyrsta leik eftir rautt spjald í lokaleik síðasta tímabils og Arnþór Hermanns að stíga upp úr meiðslum.

Mikill taugatitringur var í liðinu til að byrja með og gestirnir reyndu mikið að fara upp kantana en við vörðumst vel þó þeir hafi fengið leiðinlega margar hornspyrnur. Eftir eina slíka átti Nigel Quashie skot í stöngina en annars skapaðist ekki mikil hætta. Þó kom eina mark leiksins eftir hornspyrnu en boltinn hafði þá farið út úr teignum og komum við honum ekki mikið lengra en upp miðjan vallarhelming okkar. Þar fékk Hafsteinn Rúnar Helgason boltann, lék á einn Völsung og þrumaði boltanum neðst í markhornið af ca 25 metra færi. Gott skot og flott mark, staðan 0-1 fyrir BÍ/Bolungarvík.

Okkar besta færi í fyrri hálfleik var eftir hornspyrnu Hrannars en þá skallaði Dejan Bozicic að marki, markvörðurinn missti boltann en varnarmaður náði að hreinsa af marklinu. 

Staðan því 0-1 í hálfleik og við ekki gefið mörg færi á okkur en aftur á móti ekki heldur að skapa mikið fram á við.

Leikurinn opnaðist meira í seinni hálfleik og varði Dejan Pesic gott skot úr teignum með fótunum og út. Hrannar átti skot úr aukaspyrnu yfir markið og Guðmundur Óli átti hættulegar spyrnur utan af velli. Hafþór Mar skallaði eina þeirra rétt framhjá markinu og aðra þeirra átti markvörður gestanna í miklum vandræðum með, bakkaði að marki og náði að grípa boltann rétt undir slánni, lenti inni í markinu en tókst að halda boltanum við marklínu. Því miður ekki allur boltinn inni þar.

Áður höfðum við gert tvær breytingar til þess að reyna að fríska upp á okkar leik en Ásgeir og Halldór Fannar komu inná í stað Péturs og Hafþórs.

Rétt fyrir leikslok átti Halldór Fannar svo vinstri fótar skot frá vítateigsboga sem fór rétt yfir markið. Skömmu síðar flautaði Jan Eric til leiksloka og báru gestirnir frá Vestfjörðum því sigur úr býtum hér í dag. 0-1 niðurstaðan.

Völsungar spiluðu fínan varnarleik lengst af í dag. Gáfu afar lítið af opnum færum og vorum sterkir fyrir aftast. Á móti tókst okkur ekki að skapa okkur nægilega afgerandi færi fram á við. Það leiddi til þess að við misstum höfuðið löngu áður en leikurinn var úti og uppskárum fjögur gul spjöld á síðustu 20 mínútunum. Við hreinlega megum bara ekki við því. Að því sögðu fannst mér vanta örlítið upp á samræmi í spjaldaveitingu dómarans en gestirnir komust upp með margítrekuð brot. Sérstaklega þá þegar Guðmundi Óla var skóflað í jörðina er hann var á harðaspretti og greinilega slasaðist töluvert. Hann kláraði þó leikinn og vonandi hrjáir þetta honum ekki lengur en út daginn.

Tími aðlögunar er liðinn. 1.deildin er hafin og það er við sterkari andstæðinga en áður að glíma. Menn verða bara að grafa inn og sækja auka prósent í kraft, áræðni og dugnað og stíga upp og mæta þessum liðum. Við verðum bara að gefa í og læra á deildina með því. Fall er fararheill og við skulum vona að maðurinn hafi ekki logið þegar hann sagði það. Allir geta klárlega stigið upp og bætt sinn leik og á það við um leikmenn, þjálfara, stjórn, stuðningsmenn og umfjöllunarteymið. Það geta allir gert betur!

Péter Odrobéna var valinn maður leiksins en hann var fremstur meðal jafningja í varnarleik liðsins.

Næsti leikur liðsins er gegn KF en hann fer fram í Boganum mánudaginn næsta kl.20.30. Við hvetjum Völsunga til þess að renna þangað og hvetja okkar drengi til dáða í þeim leik sem og öðrum.

Tengdar greinar:
Halldór Orri: Skemmtilegur hópur og góður þjálfari
Sigvaldi Þór: Óþarfa gul spjöld í dag
Hér er hægt að skoða fleiri myndir úr leiknum