Völsungar tylltu sér á toppinnÍþróttir - - Lestrar 700
Völsungar tylltu sér á topp 2.deildar að 13 umferðum loknum með glæsilegum sigri á Mærudögum.
Andstæðingurinn að þessu sinni var Víðir Garði sem hafði unnið tvo leikina á undan eftir erfiða byrjun.
Jóhann Kristinn Gunnarsson, þjálfari Völsungs, hélt tölu fyrir stuðningsmenn áður en leikur hófst og kom inn á það hvað stemningin í hópnum færi síbatnandi. Vikan á undan hafði verið góð en eftir sigur á þáverandi toppliði Aftureldingar um síðustu helgi virtist hver einn og einasti leikmaður stíga upp.
Himnarnir grétu þegar flautað var til leiks en það kom þó ekki í veg fyrir góða mætingu í brekkuna. Bæði lið virtust ætla að selja sig dýrt og skiptust þau á að sækja. Gestirnir réðu illa við hraða Ásgeirs Kristjánssonar en færin sem skópust í kjölfarið fóru forgörðum.
Víðismenn skoruðu mark eftir aukaspyrnu sem flaggað var af vegna rangstöðu.
Heimamenn komust svo loks yfir á 41.mínútu eftir gott hlaup Bjarka Baldvinssonar inn í teiginn. Hann lagði boltann út í teig á Elvar Baldvinsson sem skaut en markvörðurinn varði út í teig. Elvar ákvað að láta ekki bjóða sér það tvisvar og af harðfylgi kom boltanum í netið. 1-0.
Örskömmu síðar, á markamínútunni 43., átti Bjarki svo glæsilega stungusendingu á Ásgeir sem kláraði af mikilli yfirvegun í markhornið. 2-0 og var staðan þannig þegar flautað var til hálfleiks.
Á 70.mínútu rak Sæþór Olgeirsson svo síðasta naglann í kistu Víðismanna. Eftir laglegt spil datt boltinn fyrir fætur Sæþórs utan teigs sem negldi honum fast með jörðinni í hornið nær. 3-0 og mikill fögnuður sem braust út í leikslok.
Völsungur hoppaði því upp í 1.sætið þar sem úrslit annarra leikja voru hagstæð. Okkar menn sitja þar með 27 stig en Afturelding situr í 2.sæti með 25 stig. Þéttur pakki er svo frá 3.sæti niður í 7.sæti.
Gríðarmikilvægur sigur Völsunga en stutt er í næsta leik. Strákarnir ferðast til Ísafjarðar á miðvikudaginn og mæta þar Vestra kl.18.00 í hörkuleik. IBG
Hér koma myndir sem ljósmyndari 640.is tók á leiknum og með því að smella á þær er hægt að fletta þeim og skoða í stærri upplausn
Elvar Baldvinsson skorar hér af miklu harðfylgi.
Ásgeir Kristjánsson tvöfaldar hér forystu heimamanna.
Fyrirliðinn Bjarki Baldvinsson átti tvær sendingar sem gáfu mörk.
Baráttan var hörð.
Sæþór Olgeirsson skýtur hér að marki en inn vildi boltinn ekki.
Guðmundur Óli Steingrímsson sendir hér boltann fyrir...
..og Sæþór kom honum í netið og hér fagnar þeir Elvar.
Toppstaða.
Völsungar sækja.
Guðmundur Óli kom af velli þegar 10 mínútur voru eftir af leiknum og í hans stað kom Baldur Ingimar Aðalsteinsson en það munu vera 20 ár síðan hann lék síðast heimaleik með Völsungi.
Baldur lætur finna fyrir sér.
Olgeir Heiðar annar af vatnsberum Völsungs þakkar hér hinum sænska Victor Pehr Emanuel Svensson fyrir leikinn.
Lið Völsungs gegn Víði á Mærudögum 2018.