VÍS hefur gefið Slysavarnaskólanum 50 björgunargalla

„Gallarnir eru í stöðugri notkun enda sækja um 2.500 nemendur námskeið okkar á hverju ári. VÍS hefur stutt dyggilega við bak Slysavarnaskólans um árabil og lagt mikið af mörkum í baráttunni fyrir auknu öryggi um borð í íslenska flotanum. Ekki bara með þessari árlegu gjöf heldur einnig markvissu forvarnarstarfi hjá viðskiptavinum sínum sem við veitum lið,“ segir Hilmar Snorrason skólastjóri.

Auður Björk Guðmundsdóttir framkvæmdastjóri fyrirtækjasviðs VÍS segir fyrirtækinu renna blóðið til skyldunnar. „Við leggjum mikið upp úr öryggi og forvörnum í öllu okkar starfi. Með liðsinni Slysavarnaskóla sjómanna stuðlum við að bættri öryggismenningu í sjávarútvegi og höfum í sameiningu komið mörgu góðu til leiðar í samstarfi við okkar viðskiptavini.“ 

Undanfarna áratugi hefur banaslysum til sjós fækkað hratt. Á árunum 1971 – 1980 voru þau 203, 116 áratugnum síðar, 63 banaslys frá 1991 – 2000 og 21 á fyrsta áratug þessarar aldar. Öðrum slysum á hafi úti hefur einnig fækkað. Engu að síður er mikið verk að vinna samanber að í fyrra voru á þriðja hundrað slys til sjós skráð hjá Sjúkratryggingum Íslands.

Auður Björk Guðmundsdóttir afhendir Hilmari Snorrasyni skólastjóra Slysavarnaskóla sjómanna björgunargallana.