Umferðarhraði mælist of mikill í Reykjahlíð

Á fundi sveitarstjórnar Skútustaðahrepps á dögunum var lagt fram minnisblað frá skipulagsfulltrúa þar sem farið var yfir niðurstöður í umferðamælingu sem framkvæmd var í þéttbýlinu Reykjahlíð dagana 26. júlí 2018 til 9. ágúst 2018.

Á heimasíðu hreppsins segir að umferðagreinir hafi verið settur upp annars vegar á Múlavegi og hins vegar á Hlíðavegi og umferð mæld í um viku tíma á hvorum stað. Niðurstöður sýna að hraði í þéttbýlinu er of mikill en hámarkshraði er 50. Þrír ökumenn mældust t.d. á um 90 km hraða sem er alveg glórulaust. 

Sveitarstjórn tekur undir bókun skipulagsnefndar að grípa þurfi til aðgerða til að draga úr umferðarhraða í þéttbýlinu og felur sveitarstjóra og skipulagsfulltrúa að vinna að úrbótum. Verður gripið fljótt til nauðsynlegra aðgerða og verða þær kynntar fljótlega.