Tvö skemmtiferðaskip í höfn samtímis

Skemmtiferðaskip við bryggju í gær.

Tvö skemmtiferðaskip voru samtímis í höfn á Húsavík í gær og settu farþegar þeirra mark sitt á bæjarins og fram til sveita.

Þetta voru Ocean Diamond og National Geography Explorerog sóttu farþegar þess síðarnefnda m.a. Byggðasafn Suður-Þingeyinga á Grenjaðarstað heim.

Hópurinn var á vegum Fjallasýnar sem bauð upp á menningar- og söguferð þar sem gamli bærinn á Grenjaðarstað var aðaláfangastaðurinn.

Að sögn Sifjar Jóhannesdóttur forstöðumanns Menningarmiðstöðvar Þingeyinga tóku starfsmenn safnsins á móti hópnum í viðeigandi búningum og leiðsögðu um bæinn.

Heimsóknin hófst í kirkjunni þar sem sögð var saga staðarins og byggingarsaga húsanna. Því næst var farið um allan bæ sem er afar fallegur og rúmgóður og hentar vel til að taka á móti hópum.

Einnig var gestunum að góðum íslenskum sið boðið upp að smakka það besta sem til var í bænum, flatkökur með reyktum silungi, harðfisk með smjöri og skyr með rjóma. Það rann allt ljúflega niður og þótti harðfiskurinn betri en lyktin gaf vísbendingu um.

Í sumar er í fyrsta sinn rekin handverksala í Hlöðunni þjónustuhúsi við bæinn, hún vakti athygli gestana enda þar þjóðlegt og fallegt handverk í boði. 

Það var tekið á móti gestum í viðeigandi búningum á Grenjaðastað. Fv. Sigurlaug Dagsdóttir, Sif Jóhannesdóttir og Búi Stefánsson.

Ocean Diamond og National Geography Explorer við bryggju.

Jónas Sævarsson hafngæslumaður var á vaktinni við Bökugarðinn.

Ocean Diamond lætur úr höfn síðdegis.

National Geography Explorerá útleið.

Með því að smella á myndirnar má fletta þeim og skoða í stærri upplausn.