Þróa armband með innbyggðu staðsetningartæki

Hópurinn sem stendur að NaviTech.

Hópur úr Háskólanum í Reykjavík sem samanstendur af sex nemendum úr mismunandi deildum hefur unnið undanfarið að þróun armbands með innbyggðu staðsetningartæki.

Hugmyndin að baki snýr að því að auka öryggi sjómanna en armbandið myndi virka þannig að ef að sjómaður félli fyrir borð myndu neyðarboð frá armbandinu gera skipstjóra og björgunaraðlium viðvart um ástandið. Viðeigandi björgunaráætlanir færu þá strax í gang. Möguleikanir fyrir armbandið, sem þegar hefur vakið athygli útgerðarmanna, eru fjölmargir og er það alls ekki bundið einungis við sjómenn.

Tveir Húsvíkingar eru í hópnum sem varð til á námskeiði um nýsköpun og stofnun fyrirtækja. “Þetta er þriggja vikna áfangi þar sem nemendum úr öllum deildum er raðað niður í hópa og við látin þróa viðskiptahugmynd. Hópurinn okkar er mjög þéttur og vinnum við öll mjög vel saman og höfum stofnað fyrirtæki utan um þetta sem heitir Navitech”. Segir Haukur Sigurgeirsson nemandi í viðskiptafræði en hinn húsvíkingurinn er Halldór Guðni Traustason nemandi í hátækniverkfræði.

Aðrir í hópnum eru:

Hákon Garðar Þorvaldsson nemandi í hátækniverkfræði, Röskva Vigfúsdóttir nemandi í sálfræði, Svanhildur Kamilla Sigurðardóttir nemandi í lögfræði og Mikael Ingason nemandi í viðskiptafræði.

Fv. Halldór Guðni, Röskva, Haukur, Mikael, Hákon og Svanhildur Kamilla.

Upplýsingar um Navitech má sjá á vefsíðu fyrirtækisins