Þeistareykjastöð komin í fullan rekstur

Nýja vélasamstæðan á Þeistareykjum í forgrunni.

Önnur vélasamstæða aflstöðvarinnar að Þeistareykjum hefur nú verið tekin í notkun og er því 17. aflstöð Landsvirkjunar komin í fullan rekstur.

Um er að ræða fyrstu jarðvarmavirkjunina sem Landsvirkjun reisir frá grunni, en hún samanstendur af tveimur 45 MW vélasamstæðum og er því alls 90 MW.

Á heimasíðu Landsvirkjunar segir að Þeistareykjastöð hafi verið gangsett við hátíðlega athöfn í nóvembermánuði síðastliðnum, þegar fyrsta vélasamstæðan var formlega ræst og tengd við flutningskerfi Landsnets. Framkvæmdir við annan áfanga hafa gengið vel, en önnur vélasamstæðan kom til Þeistareykja fyrir ári síðan, í apríl 2017, og stóð uppsetning hennar yfir fram í lok janúarmánaðar.

Frá miðjum febrúar hefur vélasamstæðan verið í tilraunarekstri þar sem öll virkni hennar hefur verið sannreynd, allt þar til nú að Landsvirkjun hefur tekið formlega við rekstri hennar. Framkvæmdin hefur fylgt áætlun frá fyrsta degi en það má einkum rekja til góðrar og árangursríkrar samvinnu allra þeirra sem að henni hafa komið.

Framkvæmdum við Þeistareykjavirkjun fer brátt að ljúka. Gert er ráð fyrir að öllum framkvæmdum, að undanskildum yfirborðsfrágangi, ljúki í byrjun sumars. Vinna við yfirborðsfrágang er í útboðsferli, þar sem tilboð verða opnuð í lok apríl og stefnt á að vinna geti hafist í byrjun júní. Áætlað er að verkinu ljúki í haust og með því lýkur framkvæmdum á Þeistareykjum í bili.