Stundar veiðar í Suðurhöfum

Sigurgeir Pétursson skipstjóri.

Húsvíkingurinn Sigurgeir Péturs-son skipstjóri hefur verið búsettur á Nýja Sjálandi sl. 25 ár og er nú skipstjóri á verksmiðjutogaranum Tai An.

Sigurgeir hefur verið með skipið frá árinu 2007 en það er gert út af argentínskri útgerð frá borginni Ushuaia. Borgin er syðsta borg Argentínu og jafnframt syðsta borg i heimi,  á rúmum 55. gráðu suðlægrar breiddar.

Frá þessu er sagt á heimasíðu Þorgeirs Baldurssonar ljósmyndara og sjómanns.


Tai An var smíðað í Japan 1981 en skipið er 105 metra langt og 3.060 brúttótonn. Ljósmynd: Sigurgeir Pétursson.

„Við erum með um 95 manns í áhöfn og er 80% þeirra argentínskir, ég og stýrimaðurinn Íslendingar og restin Kínverjar,“ segir Sigurgeir í samtali við Þorgeir.


„Við stundum aðallega veiðar á þrem tegundum. Hokinhala (Hoki), kolmunna og tannfiski (Patagonian Toothfish). Við vinnum hokinhalann og kolmunnann aðallega í surimi en getum einnig pakkað hoki í flakapakkningar.


Tannfiskurinn, sem er afar verðmætur, er bara hausaður og sporðskorinn. Fyrir hann svoleiðis fáum við yfir 20 bandaríkjadollara á kílóið þannig að það er eftir miklu að sækjast þar en kvótinn af þeirri tegund á þessu ári var ekki nema 550 tonn hjá okkur.
Við veiðum bæði með flottrolli og botntrolli og til gamans má geta þess að öll veiðarfæri eru keypt frá Hampiðjunni.

Þegar við erum að framleiða surimi getum við fryst um 75 tonn af afurðum á dag en til þess þurfum við rétt um 300 tonn upp úr sjó. Við erum með 5 flökunarlínur  til að flaka fiskinn og afköstinn því óhemjumikil þegar verið er að keyra slíkt magn í gegn, stundum dögum saman.

Allur úrgangur fer i mjöl. 
Frystilestin tekur um 1.200 tonn og erum við yfirleitt i 50-60 daga túrum en þó kemur fyrir að skipið hefur verið fyllt á styttri tíma. Allir yfirmenn fara annan hvern túr en argentínsku undirmennirnir fara tvo túra og svo einn í frí. Kínverjarnir eru með öðruvísi skipulag á fríum.


Lífið um borð er afar rólegt. Mest bara unnið, borðað og sofið. Við erum með tvo messa og bæði argentínskan og kínverskan kokk. Þessir  þjóðflokkar hafa afar mismunandi matarsmekk og því ekki hægt annað en að hafa þetta aðskilið,“ segir Sigurgeir að lokum.

Fleiri myndir sem sýna lífið um borð í Tai An er hægt að skoða á heimasíðu Þorgeirs Baldurssonar.