Stelpurnar hefja leik í úrslitakeppninni í dag

Það eru 8 lið sem komast í úrslitakeppnina og etja kappi um tvö laus sæti í efstu deild að ári. Völsungsliðið hefur leikið feikilega vel í sumar og skorað 65 mörk í 12 leikjum og einungis fengið á sig 4.

Eins og fram hefur komið er andstæðingurinn í 8. liða úrslitunum FH. Fyrri leikurinn er leikinn í Kaplakrika á laugardaginn klukkan 14:00.

Harpa Ásgeirsdóttir fyrirliði Völsungs.

"Við höfum spilað við FH nokkrum sinnum áður og hafa það alltaf verð hörkuleikir", segir Harpa sem er spennt fyrir komandi viðureign. Seinni viðureigning verður svo þriðjudaginn 1. september á Húsavíkurvelli klukkan 17:30. "Leikirnir leggjast vel í mig, FH er með hörku lið og gerum við ráð fyrir erfiðum leikjum. Markmiðið fyrir fyrri leikinn er að halda viðureigninnni lifandi fyrir seinni leikinn og njóta augnabliksins", segir Róbert Ragnar Skarphéðinsson þjálfari meistaraflokks kvenna hjá Völsungi.

Stuðningur við liðið er mikilvægur í þessum leik sem öðrum, "að fá fólk í brekkuna í svona leikjum og í raun bara öllum leikjum er gríðarlega mikilvægt. Að líta upp í brekku þegar hún er full af fólki og heyra í Dóru Ármanns hvetja mann áfram, jafnvel heyra í Einari mág segja nokkur vel valin orð er kláralega hluti af leiknum og gefur manni eitthvað aukalega", segir Harpa að lokum.