Sparisjóðurinn veitir veglega styrki til samfélagsins

Helga Dögg afhenti björgunarsveitarkonum styrkinn.

Vegna góðrar afkomu Sparisjóðs Suður-Þingeyinga á undanförnum árum hafa samfélagsstyrkir sparisjóðsins verið með myndarlegasta móti.

Nýverið veitti sparisjóðurinn eftirtöldum aðilum þessa styrki:

Styrktarsjóður Heilbrigðisstofnunarinnar á Húsavík, 500.000

Gjafasjóður Dvalarheimilsins Hvamms, 250.000

Björgunarsveitin Garðar, Húsavík 250.000

Björgunarsveitin Þingey, Þingeyjarsveit 150.000

Könnunarsafnið Húsavík, 150.000

Hvalasafnið, styrkur til fræðslumála 460.000,-

Alls hafa verið greiddir út styrkir til samfélagslegra málefna á starfssvæði sparisjóðsins vegna rekstrarársins 2018, að fjárhæð 9,8 mkr.

Í fréttatilkynningu segir að sparisjóðir hafi afmarkað félagslegt hlutverk sem felst í því að leggja tilgreindan hluta hagnaðar til samfélagslegra málefna. Þetta samfélagslega hlutverk er skilgreint svo í 63.gr. laga um fjármálafyrirtæki:  Sparisjóður skal ráðstafa að lágmarki 5% af hagnaði liðins árs fyrir skatt, til samfélagslegra verkefna á starfssvæði sínu.

Sparisjóðir eru stundum kallaðir tvímarkmiðs-fjármálastofnanir (e. dual bottom line institutions) þar sem þeir starfa ekki aðeins með eitt markmið í huga – hámörkun hagnaðar – eins og hlutafélög almennt.  (Úr skýrslu Rannsóknarnefndar Alþingis 2014)

Starfssvæði Sparisjóðs Suður-Þingeyinga er skilgreint í 2.gr. samþykkta sparisjóðsins og telst skv. skilgreingingu laga um fjármálafyrirtæki vera Þingeyjarsýslur. Sparisjóðurinn er sjálfseignarstofnun og hefur það hlutverk að stunda sjálfbæra svæðisbundna fjármálastarfsemi á grundvelli samfélagslegrar ábyrgðar, starfsemi sem stendur vörð um og þróar atvinnulíf, mannlíf og velferð svæðisins.

Þingeyingar búa betur en flestir landsmenn varðandi það að eiga sinn sparisjóð því nú eru eingöngu 4 starfandi sparisjóðir í landinu. Stofnfjárhöfum hefur fjölgað umtalsvert á undanförnum árum og eru nú rúmlega 420 talsins.

Helga Dögg Aðalsteinsdóttir þjónustustjóri Sparisjóðs Suður-Þingeyinga á Húsavík afhenti björgunarsveitarkonum 250.000 kr. styrk  sl. föstudag. Fv. Sigrún Karlsdóttir, Helga Dögg, Guðrún Thorarensen, Inga Heiða Snorradóttir, Rakel Hera Júlíusdóttir og Kristjana Lilja Einarsdóttir.

Helga Dögg ásamt Guðrúnu Guðbjartsdóttur og Auði Gunnarsdóttur hjá Styrktarsjóði HSN á Húsavík.

Friðrika Baldvinsdóttir tók við styrknum fh. Gjafasjóðs Dvalarheimilisins Hvamms.