Soffía Kristín Jónsdóttir ráðin Framkvæmdastjóri Mývatnsstofu

19. júl

Soffía Kristín Jónsdóttir ráðin Framkvæmdastjóri Mývatnsstofu
Fréttatilkynning - - Lestrar 794

Soffía Kristín Jónsdóttir.

Soffía Kristín Jónsdóttir hefur verið ráðin framkvæmdastjóri Mývatnsstofu.

Soffía Kristín er frá Vogum í Mývatnssveit og hefur í gegn um tíðina unnið fyrir fjölmörg fyrirtæki í sveitinni.

Hún rekur einnig tónlistarfyrirtækið Iceland Sync Management ehf ásamt Steinunni Camillu Sigurðardóttur sem stendur að umboðsmennsku tónlistarfólks, viðburðum og tónleikahaldi.

Hún er menntuð frá Bandaríkjunum með BS í Music Business og ætlar að tengja sína reynslu í viðburðarstjórnun og markaðssetningu við fyrirtækin og samfélagið sem Mývatnsstofa þjónustar.

Í tilkynningu segir að félagið hafi nýlega farið í gegn um stefnumótun leidda af Thorp Consulting ehf. Í kjölfar þess hefur verið gerð ný viðskipta- og rekstraráætlun sem mun vinna að byggingu vörumerkisins Visit Mývatn með hnitðmiðaðri markaðssetningu á netinu. Mývatnsstofa mun einnig halda áfram að koma að stjórnun viðburða í sveitinni.

Stærstu viðburðir sem Mývatnsstofa hefur komið að eru Jólasveinarnir í Dimmuborgum og Mývatnssmaraþonið en samkvæmt nýrri viðskiptaáætlun mun Mývatnsstofa koma að uppbyggingu fleirri viðburða í sveitinni sem munu dreifast jafnt yfir árið.

Markmið félagsins er að fá ferðafólk til að staldra lengur við í Mývatnssveit og vinna að verðmætasköpun atvinnulífsins sem stuðlar að eflingu lífsgæða og betra mannlífi í sveitinni.

« Til baka