Samstarfssamningur á milli Íþróttafélagsins Völsungs og Íslandsbanka undirritaður

Líkt og undanfarin ár hafa íþróttafélagið Völsungur og Íslandsbanki gert með sér samstarfssamning sem hefur það að markmiði að styðja Íþróttafélagið Völsung í íþróttalegu og uppeldislegu hlutverki sínu á Húsavík.

Samningurinn sem gildir út árið 2019 felur m.a. í sér, að auk árlegs styrks, sem stjórn Völsungs sér um að skipta á milli deilda félagsins, þá veitir Íslandsbanki viðurkenningar þar sem íþróttafólk Völsungs er heiðrað í lok ársins og tekur einnig þátt í Sólstöðuhlaupi Völsungs með mótframlagi en öll þátttökugjöld vegna hlaupsins renna til góðgerðarstarfsemi á svæðinu. 

Á síðasta ári tók Völsungur að sér umsjón og framkvæmd Mærudagshlaups Íslandsbanka og verður sama fyrirkomulag í ár. Hlaupið er haldið á laugardegi um Mærudagshelgi og hefur verið vel sótt undanfarin ár.

Framkvæmdastjóri Völsungs, Jónas Halldór Friðriksson og útibússtjóri Íslandsbanka á Húsavík, Margrét Hólm Valsdóttir undirrituðu samninginn fyrir hönd aðila.