Rauði krossinn í Þingeyjarsýslu opnar fataverslun á Húsavík

Kristján Þór sveitarstjóri var fyrsti kúnninn.

Það var margt um manninn í gær þegar Rauði krossinn í Þingeyjarsýslu opnaði fataverslun sína að Garðarsbraut 44 hér í bæ.

Gestir við opnunina voru ánægðir með þetta framtak en Félag eldri borgara leigir Rauða krossinum húsnæðið og sameiginlega aðstöðu fyrir starfsfólk.

Fram kom í máli Halldórs Valdimarssonar formanns Rauða krossins í Þingeyjarsýslu að hópur sjálfboðaliða hafi að undanförnu unnið að því að koma fatabúðinni upp undir stjórn Guðrúnar Margrétar Einarsdóttur hópstjóra verkefnisins.

Lögð er áhersla á að hafa á boðstólum gott fataúrval, jafnvel nýlegt eða nýtt, sem allt er fengið frá fataflokkun Rauða krossins í Reykjavík.

Sveinn Kristinsson formaður Rauða krossins og Kristín Hjálmtýsdóttir framkvæmdastjóri komu norður og aðstoðuðu við uppsetningu og voru við opnunina. Hér eru þau á tali við Kristbjörn Óskarsson liðsmann Rauða krossins í Þingeyjarsýslu.

Föt sem safnast af svæði Þingeyjarsýsludeildar fara í fatagáma sem eru á Þórshöfn, Raufarhöfn, Kópaskeri, Húsavík og Laugum og eru þau flutt til Reykjavíkur til í flokkunar.

Flytjandi er styrktaraðili fatasöfnunarinnar og flytur fötin endurgjaldslaust fyrir Rauða krossinn, sumt fer í Rauðakrossbúðirnar út um allt land, annað beint til bágstaddra innanlands og utan og afgangurinn fluttur til endurnýtingar í Evrópu. Allur ágóði af fatasölunni fer til mannúðarmála Rauða krossins.

Að sögn Halldórs verður tekið á móti smávöru, öðru en húsgögnum, til að hafa á boðstólum í búðinni sem verður opin fyrst um sinn á þriðjudögum og fimmtudögum frá 16 –18.

"Við bjóðum Þingeyinga, ferðamenn og gesti velkomna í búðina okkar, til að gera góð kaup, styðja gott málefni og stuðla að heilbrigðri endurnýting verðmæta" sagði Halldór Valdimarsson m.a þegar hann opnaði fataverslunina formlega að viðstöddum fjölda gesta.

Kristbjörn Óskarsson hefur löngum verið meðal fyrstu viðskiptavina þegar verslanir opna á Húsavík en nú brá svo við að hann var á bak við búðarborðið.

Kristján Þór Magnússon sveitarstjóri Norðurþings greip því tækifærið og varð fyrstur til að eiga viðskipti við nýju verslunina. Hér eru þau Guðrún Margrét Einarsdóttir og Kristján Ingi Jónsson að afgreiða hann og Halldór formaður fylgist með.

Og síðan gerðu menn hver af öðrum kjarakaup hjá Rauða krossinum.

Hér að neðan eru nokkrar myndir til viðbótar frá opnuninni og með því að smella á þær er hægt að fletta þeim og skoða í stærri upplausn.