Nýtt leiktæki á lóð Borgarhólsskóla - Gjöf frá Orkuveitu Húsavíkur

Nemendum Borgarhólsskóla og börnum á Húsavík barst góð gjöf frá Orkuveitu Húsavíkur í gær.

Á vef skólans segir að um sé að ræða alhliða hjólabraut sem var komið upp á skólalóðinni en nemendur nota hlaupahjól, hjólabretti og hvers konar aðra hjólhesta til að renna sér á brautinni.

Á skólatíma er þess krafist að nemendur séu með hjálm á brautinni enda með vísan í umferðarlög sem segja; „Barn yngra en 15 ára skal nota hlífðarhjálm við hjólreiðar og hjálmurinn þarf að vera í réttri stærð og rétt stilltur. Mælt er með að fullorðnir noti einnig hjálm enda mikilvægur öryggisbúnaður“.

Nemendur eru eðli málsins samkvæmt spenntir þegar nýtt leiktæki bætist á skólalóðina. Þeir komu með ákaflega góðar ábendingar varðandi uppsetningu og skipulag á brautinni. Líkt og með sparkvellina er nemendahópum úthlutaður tími á brautinni.