20. maí
Norðurþing- Krefjast þess að menntamálaráðherra falli frá áformum um sameininguAlmennt - - Lestrar 172
Á fundi bæjarstjórnar Norðurþings í gær voru málefni Framhaldsskólans á Húsavík og áform Menntamálaráðherra um skólann til umræðu.
Bæjarstjórn samþykkti eftirfarandi ályktun samhljóða.
Fyrir skömmu var greint frá fyrirætlun ráðherra menntamála að sameina þrjá framhaldsskóla á Norðurlandi, Framhaldsskólann á Húsavík og menntaskólana á Akureyri og Tröllaskaga.
Framhaldsskólinn á Húsavík er þegar í samstarfi við aðrar skólastofnanir og ekkert er því til fyrirstöðu að slíkt samstarf verði aukið frekar, án þess að komi til einhliða ákvörðunar um sameiningu. Ekkert samráð hefur verið haft við heimamenn um málið heldur lekur það í fjölmiðla.
Það er reynsla ýmissa byggðalaga að þegar stofnanir eru sameinaðar öðrum er það undanfari þess að þær leggjast af. Það þarf ekki að tíunda um þá grafalvarlegu stöðu sem slíkt hefur í byggðalegu tilliti, veikingu innviða og lakari búsetugæði í héraði.
Bæjarstjórn Norðurþings krefst þess að menntamálaráðherra falli frá áformunum um fyrirhugaða sameiningu enda hafi engin rök verið færð fyrir henni.
640.is á Facebook