Norðursigling boðar tímamót í vistvænum samgöngum

Nýr skrúfubúnaður sem þróaður hefur verið sérstaklega fyrir Opal hefur þá sérstöðu að hægt er að hlaða rafgeyma skipsins undir seglum. Að jafnaði verða rafgeymarnir hlaðnir þegar skipið kemur til hafnar með umhverfisvænni orku af orkukerfi landsins. Í hvalaskoðunarferðum mun rafmótorinn knýja  skrúfubúnaðinn en þegar skipið siglir fyrir seglum er hægt að breyta skurði skrúfublaðanna og nýta búnaðinn til að hlaða rafmagni inn á geyma skipsins. Þetta er í fyrsta skipti sem slík tækni er nýtt um borð í skipi og hefur hún vakið mikla athygli þar sem hún hefur verið kynnt erlendis. Í framhaldi af fyrstu hvalaskoðunarferð Opal um Skjálfanda er gert ráð fyrir að skipið fari í leiðangur til austurstrandar Grænlands.

Fjölþjóðlegt þróunarsamstarf

Nýtt rafkerfi, rafhlöður, drif og skrúfa hafa verið hönnuð í Opal í samstarfi Norðursiglingar við teymi norrænna samstarfsaðilla. Þannig hafa fyrirtækin Caterpillar Propulsion (Svíþjóð) og Wave Propulsion (Noregi) hannað skrúfubúnaðinn, en  íslenska fyrirtækið Naust Marine hefur hannað raf- og stjórnkerfi í samstarfi við Clean eMarine (Danmörku) og Anel AS (Noregi). Aðrir aðilar að verkefninu eru  Lakeside Excursion (Færeyjum), Bellona (Noregi), Íslensk Nýorka og Nýsköpunarmiðstöð Íslands. Lithium Storage (Swiss) sérframleiddi rafgeyma fyrir Opal. en eftirtaldir aðilar hafa  styrkt hafa verkefnið; Nordisk Atlantssamarbejde (NORA), Innanríkisráðuneytið, Transnova, Nordic Innovation, Samgöngustofa,  og Orkusjóður. Eftirleiðis mun Opal eingöngu ganga fyrir vistvænu rafmagni og gamla dieselvélin um borð verður eingöngu nýtt sem varaafl. Samtímis vélabreytingunni hefur skrokkur skipsins verið yfirfarin og styrktur auk þess sem seglbúnaði hefur verið breytt til að nýta vindorkuna betur.  Erlendir fjölmiðlar hafa sýnt málinu áhuga og er gert ráð fyrir að nokkrir þeirra muni koma hingað til lands að fylgjast með þessum viðburði. 

 Floti Norðursiglingar rafvæddur

Árni Sigurbjarnason einn af stofnendum Norðursiglingar segir að það skref sem nú sé stigið sé í samræmi við stefnu Norðursiglingar að vera leiðandi í umhverfisvænni ferðaþjónustu við strendur Íslands og Austur–Grænlands. „Stefna Norðursiglingar er að lágmarka útblástur gróðurhúsalofttegunda frá starfsemi fyrirtækisins um leið og farþegar okkar eiga að njóta fræðslu um umhverfisvernd og sjálfbæra nýtingu auðlinda.  Ef verkefnið gengur vel  stefnum við að því að breyta öðrum skipum Norðursiglingar einnig í rafskip þannig að hægt verði að nálgast hvalina með lágmarks ónæði og  gera hvalaskoðunina enn umhverfisvænni,“ segir Árni Sigurbjarnarson.

Ferðþjónusta í óbyggðum færð á nýtt stig

Jonas Granath framkvæmdastjóri hjá Caterpillar Propulsion í Svíðþjóð segir að það hafi vissulega verið áskorun að þróa skrúfubúnað fyrir seglskip sem sé um leið túrbína sem hleður rafmagni á geyma skipsins . „Takmarkið var að ná hámarksnýtni úr lágmarks orku svo hægt væri að kynna  til sögunnar „Hið raunverulega umhverfisvæna skip“ án koltvísýringslosunar.  Markmið Norðursiglingar eru umhverfisvæn og fela í sér raunverulega nýsköpun.  Þau munu án efa færa íslenska ferðaþjónustu í óbyggðum á nýtt stig.  Hvalaskoðunarsigling án nokkurrar mengunar, í algjörri þögn og í mikilli nálægð við þessi villtu dýr hlýtur að vera einstæð reynsla. Við erum stoltir að hafa átt þátt í að gera hana mögulega,“ segir Jonas Granath.

Stór viðburður

Jón Björn Skúlason framkvæmdastjóri Íslenskrar NýOrku segir að erlendis sé vel fylgst með þróunarstarfi Norðursiglingar á Húsavík.  „Í þessu verkefni er verið að nýta tækni frá mörgum ólíkum aðilum og púsla henni saman í nýjung sem enginn hefur áður séð.  Ég tel þetta einn stærsta viðburð í nýtingu vistvænnar orku sem átt hefur sér stað hér á landi í langan tíma,“ segir Jón Björn Skúlason. Stærstu hluthafar Íslenskrar NýOrku eru íslenska ríkið, Orkuveita Reykjavíkur, Landsvirkjun og HS Orka.

Nýsköpunar verkefni

„Við erum stolt af þátttöku okkar í þessu nýsköpunarverkefni,“ segir Frederic Hauge, stofnandi og forstjóri Bellona Foundation. „Við teljum að drifbúnaðurinn. sem hefur verið þróaður henti mjög vel, jafnt í nýjum sem eldri skipum. Við höfum lengi látið okkur umhverfismál og málefni norðurslóða miklu varða. Í okkar huga er mikilvægt að skip, sem sigla um heimsskautaslóðir, geti í náinni framtíð ferðast þar um án þess að skilja eftir sig kolefnisspor,“ segir Hauge.

Skonnortan Opal í siglingunni í dag og Hildur siglir í humátt á eftir.

Skonnortan Opal

Skonnortan Opal er ein nýjasta viðbótin við flota Norðursiglingar. Skipið var smíðað í skipasmíðastöðinni Bodenwerft í Damgarten, Þýskalandi árið 1951 sem togari og stundaði veiðar á Eystrarsalti, í Norðursjó og á Barentshafi.  Árið 1973 hófu þáverandi eigendur endurbyggingu skipsins og á næstu 8 árum var Opal breytt í þá glæsilegu tveggja mastra skonnortu sem hún er í dag. Skipið hefur siglt um allan heim og þar á meðal yfir Atlantshaf nokkrum sinnum.  Árið 2013 bættist Opal í flota Norðursiglingar og hefur síðan verið búið enn betur út sem leiðangursskip. Í skipinu eru sex tveggja manna káetur, þrjú baðherbergi, tvær sturtur auk aðstöðu fyrir áhöfn.  Skipið er mjög rúmgott og þægilegt fyrir allt að 12 farþega auk áhafnar í lengri leiðangrum og allt að 65 farþegum í dagsferðum. Norðursigling.

Fulltrúar samstarfsaðila verkefnisins í vígslusiglingu Ópals.

Sigmundur Davíð Gunnlaugsson forsætisráðherra ávarpar gesti á Hafnarstéttinni.

Árni Sigurbjarnason, einn af stofnendum og eigendum Norðursiglingar ávarpar gesti.

Sigmundur Davíð Gunnlaugsson hleður einn af rafmagnsbílum Norðursiglingar með orku úr seglskipinu Ópal.

Fjöldi gesta var viðastaddur formlega kynningu Norðursiglingar á rafknúna seglskipinu Opal. 

Margir nýttu sér boð um að skoða Opal en hér liggja þær saman skonnorturnar Opal og Donna Wood.

Með í að því að smella á myndirnar er hægt að fletta þeim og skoða í stærri upplausn.