Náðu í slasaðan mann upp að Kiðagili

Björgunarsveitirnar á Húsavík, Ljósavatni og í Aðaldal voru kallaðar út eftir hádegi í dag upp að Kiðagili á Sprengisandsleið.

Í tilkynningu frá Landsbjörgu sagði að maður sem ferðaðist í hópi fjór­hjóla­manna féll af ­hjóli sínu og slasaðist. Hann gat ekki ekið hjóli sínu áfram og var óskað eft­ir aðstoð við að koma hon­um til byggða.

Læknir og sjúkraflutningamenn fóru með björgunarsveitunum á vettvang og var maðurinn fluttur í bíl björgunarsveitarinnar Garðars til byggða.

Að sögn Guðmundar Salómonssonar í björgunarsveitinni Garðari sem var í aðgerðarstjórn gengu aðgerðir vel og hjálpaði það til að tíðarfar hefur verið gott að undanförnu. Fjórhjóli mannsins var komið til byggða undir kvöld.