Mynd dagsins - Glaðbeittur tjaldstæðisvörður við ysta haf

Bjarni á Mánárbakka glaðbeittur á svip.

Mynd dagsins var tekin undir kvöld á Tjörnesi, nánar tiltekið á tjaldstæðinu Camping 66.12 north á Mánárbakka.

Hún sýnir glaðbeittan tjaldstæðis-vörð sem var að taka á móti gestum og vísa á þá bletti sem þeir máttu setja sig niður á.

Bjarni Sigurður Aðalgeirsson heitir hann og í spjalli við tíðindamann 640.is kom m.a fram að sumarið hafi verið fremur rólegt á tjaldstæðinu fram undir miðjan júlí. 

"Tvær seinni vikurnar í júlí voru ágætar en eftir að fjöldatakmarkanirnar vegna Covid voru settar á á dögunum hefur verið fullt allar nætur og ég hef ég þurft að vísa fólki frá" sagði Bjarni.

Um helmingur gestanna í ár eru íslendingar en í fyrra voru þeir um 10% þeirra sem sóttu tjaldsvæðið heim.

Tjaldstæðið á Mánárbakka var opnað árið 2018 og hefur verið opið alla daga síðan. 

"Þetta hefur farið rólega af stað en það er stígandi í þessu en ég væli ekkert, það eru nógu margir sem það gera" sagði Bjarni um leið og hann rölti af stað til að taka á móti enn einum bílnum sem renndi í hlað á Mánárbakka þetta síðdegið

Með því að smella á myndina af Bjarna á Mánárbakka má sjá kappann í mun hærri upplausn.