Mikilvægur sigur hjá Völsungi gegn Sindra

Bergvin Jóhannsson skoraði þriðja mark Völsunga.

Völsungur fékk Sindra frá Hornafirði í heimsókn í 2. deildinni í kvöld og var leikið á grasvellinum.

Völsungar byrjuðu vel í rigningunni og Jóhann Þórhallsson kom þeim í 1-0 strax á 4. mínútu leiksins og þannig var staðan í leikhléi.

Um miðjan seinni hálfleik jafnaði Duje Klaric leikinn fyrir gestina og skömmu síðar gerði Páll Gíslason breytingar á liði sínu.

Bergvin Jóhannsson og Elvar Baldvinsson komu inn á og ekki liðu nema fjórar mínútur frá Elvar kom inn á að hann var búin að koma Völsungum yfir aftur. Markið skoraði hann á 72. mínútu og um tíu mínútum síðar skoraði Bergvin þriðja mark heimamanna og staðan orðin 3-1. Bergvin er nýkominn til Völsungs á láni frá Þór.

Í uppbótartíma varð Sigvaldi Þór Einarsson fyrir því óláni að skora sjálfsmark og lokastaðan 3-2 fyrir Völsungi.

Völsungur gerði í síðustu viku 1-1 jafntefli við Magna á Grenivík og eftir sigurinn í kvöld situr liðið í 9. sæti 2. deildar með 15 stig og er liðið nú fjórum stigum frá fallsæti. Sindri er í 6. sætinu með stigi meira.

Leikmenn Völsungs spiluðu með sorgarbönd til að heiðra minningu Birgis Skúlasonar sem lést í síðustu viku. Birgir hóf sinn feril með yngri flokkum Völsungs og var lykilmaður í sigurliði Völsungs þegar að það vann sig upp í 1 deild/ úrvalsdeild. Birgir var sterkur og öflugur miðjumaður og mikill Völsungur. 

Jóhann Þórhallsson kom Völsungum á bragðið strax á 4. mínútu leiksins.

Elvar Baldvinsson einn markaskorara Völsungs í leiknum í háloftunum.

Elvar og Bergur Jónmundsson horfa á eftir boltanum í mark gestanna.

Boltinn kemur inn í teig eftir hornspyrnu og andartaki síðar skallaði Bergvin Jóhannsson hann í net andstæðinganna.

Halldór Orri Hjaltason, Elvar Baldvinsson og Bergvin Jóhannsson fagna marki þess síðastnefnda.