Lífi hleypt í Þingeyska matarbúrið

Á fundi sem haldin var í upphafi sumars á Laugum var ákveðið að endurvekja Þingeyska matarbúrið sem legið hefur í dvala undanfarin ár.

 

Í framhaldinu var haldinn aðalfundur Þingeyska matarbúrsins á Fosshótel Húsavík 2. júlí sl. þar sem kosin var ný stjórn og hlutverk félagsins endurskoðað.

 

Ný stjórn félagsins er skipuð Birni Víkingi Björnssyni, Erni Loga Hákonarsyni, Guðrúnu Þ Gunnarsdóttur, Guðrúnu Tryggvadóttur, og Nönnu Steinu Höskuldsdóttur sem var kjörin formaður.

 

Að sögn Nönnu Steinu var fundurinn góður og hugur í fólki sem ákvað að athuga hvort hægt væri að koma á laggirnar matarmarkaði á Húsavík í sumar. Svo reyndist ekki vera eftir að haft var samband sem flesta framleiðsluaðila á svæðinu og áhuginn kannaður. Ekki það að áhuginn væri ekki fyrir hendi heldur þótti fyrirvarinn stuttur og er stefnt á að hafa matarmarkað á Húsavík sumarið 2019

Þingeyska matarbúrið er klasasamstarf fyrirtækja og einstaklinga á norðausturlandi sem starfa með einum eða öðrum hætti að matvælaframleiðslu og eða þjónustu. Bæði veitingahús og framleiðendur, allt frá einyrkjum til stærri framleiðslufyrirtækja.

Félagið var stofnað í október 2007 að frumkvæði Atvinnuþróunarfélags Þingeyinga og Búgarðs. Í verkefninu er lögð áherslu á að þróa, framleiða og kynna vörur og þjónustu sem byggja á Þingeysku hráefni og matarhefð.

Markmið verkefnisins:
• Stuðla að auknu heildarvirði svæðisins og meiri sjálfbærni þess í efnahagslegu og menningarlegu tilliti.
• Efla gildi svæðisins og ímynd þess út á við sem inn á við.
• Þróa, framleiða og kynna vörur og þjónustu sem byggja á þingeysku hráefni og matargerð.
• Byggja á reynslu og tengslum sem þegar hafa áunnist í öðrum samstarfsverkefnum til að ná betri árangri.
• Auka fjölbreytni á sviði ferðaþjónustu í dreifbýli, þar sem leitast er við að auka hlut íslenskrar matvælaframleiðslu og matargerðarhefða ört vaxandi atvinnugrein.

“Við viljum endilega að sem flestir gangi í félagið sem eru í framleiðslugeiranum og eða veitinga og þjónustu. Þingeyska matarbúrið er vettvangur til að þessir aðilar nái að kynnast sín á milli, miðla þekkingu og mynda tengslanet innan héraðs”. Sagði Nanna Steina en fyrir áhugasama er hægt að ganga í félagið með því að hafa samband við hana í síma 8688647 / nanna@atthing.is