Leikfélagsfréttir

01. júl

Leikfélagsfréttir
Almennt - - Lestrar 305

Sigurður Illugason í Brennuvörgum.

Leikfélag Húsavíkur er 115 ára á þessu ári. Við byrjuðum árið með æfingum á Brennuvörgunum eftir Max Frisch í leikstjórn heimamannsins Ármanns Guðmundssonar.

Frumsýnt var 7. febrúar og sýndar 9 sýningar fyrir um 600 manns. Alls tóku þátt í sýningunni um 40 manns en kringum eina sýningu kemur fjöldi fólks að störfum svo sem leikmyndasmiðir, búningagerð, hljóð og ljósamenn, ásamt förðunar og hárgreiðslufólki. Í lok apríl hófust svo æfingar á barnaleikritinu vinsæla Karíusi og Baktusi í leikstjórn Sigga Illuga. Það var frumsýnt 12. maí með takmarkaðan sýningarfjölda í boði og alls voru 7 sýningar á einni viku. Það sló rækilega í gegn bæði hjá ungviðinu og þeim sem eldri eru.

Á Mærudögum í júlí verður svo sett upp „Sögusýning Leikfélags Húsavíkur“ í Samkomuhúsinu. Þar gefst gestum og gangandi tækifæri til að kynna sér sögu LH í gegnum tíðina. Á sýningunni verða leikmunir, búningar, leikmyndir, tækjabúnaður og gríðarlegur fjöldi ljósmynda til sýnis. Jafnframt býðst gestum að skoða alla króka og kima í Samkomuhúsinu. Undanfarin ár hafa allar ljósmyndir LH frá 1934 verið skannaðar inn í tölvu og skrásettar í skráningakerfi Safnahússins en þar verða myndirnar varðveittar á rafrænu formi.

Starfsemi Leikfélagsins er lífleg um þessar mundir, mikill áhugi og hugur í fólki. Við njótum þess einstaklega vel að eiga að áhugasamt fólk á öllum aldri sem er tilbúið að nota tíma sinn innan veggja leikhússins við hin ýmsu störf.

Við þökkum öllum þeim sem hafa heimsótt okkur á árinu og vonumst til þess að sjá sem flesta á „Sögusýningu Leikfélags Húsavíkur“ í sumar.

Fyrir hönd LH

Auður Jónasdóttir

« Til baka