Landsþings KÍ á Húsavík - Myndasyrpa

38. landsþing Kvenfélaga-sambands Íslands var haldið á Fosshótel Húsavík dagana 12. – 14. október sl.

Kvenfélagasamband Suður- Þingeyinga var gestgjafi landsþingsins sem bar yfirskriftina „fylgdu hjartanu”. 

Á þinginu komu hátt í 200 kvenfélagskonur saman til skrafs og ráðagerða um störf sín í kvenfélögunum. Einnig voru framsöguerindi og pallborðsumræður um málefni hjartans og hjartaheilsu kvenna samkvæmt yfirskrift þingsins.

Þá var fyrirlestur og fræðsla um verkefni Kvenfélagasambandsins „Vitundarvakning um fatasóun“ sem og fyrirlestur sinn um „jákvæð samskipti“ sem mun án efa efla kvenfélagskonur í sínum góðu verkum eins og segir í fréttatilkynningu.

Hér koma myndir sem ljósmyndari 640.is tók í Húsavíkurkirkju þegar þingið var sett sem og í móttöku í Safnahúsinu. Einnig í hádegisverði á Fosshótel Húsavík.

Með því að smella á myndirnar er hægt að fletta þeim og skoða í stærri upplausn.

Fv. Guðrún Þórðardóttir formaður KÍ, Mjöll Matthíasdóttir formaður Kvenfélagsambands Suður-Þingeyinga og Una María Óskarsdóttir sem gerð var að heiðursfélaga KÍ á þinginu.

Þar sem þingsetning fó fram þann 12. október á bleika daginn höfðu aðstandendur þingsins; Kvenfélagasamband Íslands og Kvenfélagasamband Suður- Þingeyinga ákveðið að styrkja sérstaklega við Bleiku slaufuna með kaupum á varningi bleiku slaufunnar sérstaklega fyrir hvern þingfulltrúa, sölu happdrættismiða og hvetja konur til að mæta í bleiku á þingsetninguna sem fór fram í Húsavíkurkirkju.

Kvennakór Húsavíkur söng undir stjórn Hólmfríðar Benediktsdóttur.

Fanney Snjólaugar- og Kristjánsdóttir söng nokkur lög við undirleik Helgu Kvam.

Jan Aksel Klitgaard tók á móti konunum í Sjóminjasafninu.

Guðni Th. Jóhannesson forseti Íslands heimsótti og ávarpaði landsþingið. Í ávarpi sínu minnti forseti á mikilvægt framlag kvenfélaga til félagslífs í landinu og þakkaði fyrir það starf.

Guðni var leystur út með góðum gjöfum frá  KÍ og Kv.SÞ. Hér er Guðrún Þórðardóttir formaður KÍ að afhenda forsetanum svuntu sem ætti að koma að góðum notum við eldhússtörfin á Bessastöðum. 

Guðni Th. snæddi síðan hádegisverð með þinggestum.

Kvenfélagasamband Íslands (KÍ) var stofnað árið 1930 sem sameiningar og samstarfsvettvangur kvenfélaganna í landinu.  Innan KÍ starfa 152 kvenfélög í 17 héraðs- og svæðasamböndum með um 4500 félaga.

Á undaförnum árum hefur afrakstur vinnu kvenfélaganna, numið tugi milljóna á ári hverju, sem runnið hefur til hinna ýmsu menningar- líknarstofnana og til annarra samfélagsverkefna.