Kristján Þór Magnússon leiðir lista Sjálfstæðisflokks

Framboðslisti flokksins var samþykktur á fjölmennum félagsfundi Sjálfstæðisfélaganna í Norðurþingi í gærkvöldi.

 

Kristján var ráðinn sveitarstjóri í kjölfar síðustu kosninga af meirihluta Sjálfstæðisflokks og Vinstri Grænna.

 

„Sú ákvörðun um að koma hingað norður á heimaslóðirnar aftur, til að sinna sveitarstjórastarfinu hefur verið ótrúlega gefandi ferðalag, þroskandi og skemmtilegt. Bæði fyrir mig persónulega sem og okkur fjölskylduna alla. Það er ekki síður ánægjulegt hversu vel hefur tekist til við að leysa úr erfiðum og flóknum úrlausnarefnum á sviði sveitarstjórnarmálanna á síðustu árum, þrátt fyrir skiptar skoðanir eins og gengur á málefnum og hvar áherslurnar skuli í raun og veru liggja. Sveitarstjórn Norðurþings hefur verið virkilega samhent í stóru málunum á kjörtímabilinu, staðið saman í að verja hagsmuni íbúa og samfélagsins alls. Þar vil ég vera með öflugu fólki og vinna hér eftir sem hingað til að bættum hag íbúa Norðurþings. Ég er stoltur, glaður og þakklátur fyrir traustið sem mér hefur verið sýnt sl. fjögur ár og er reiðubúinn til að sinna starfi mínu áfram á þessum nýja grunni sem oddviti Sjálfstæðismanna, njóti ég trausts og fái ég til þess umboð að afstöðnum kosningum í vor," segir Kristján Þór í tilkynningu.

 

Kristján er fæddur og uppalinn á Húsavík. Hann er með BA-próf í líffræði frá Bates College í Maine í Bandaríkjunum, MPH meistarapróf í faraldsfræði frá Boston University School of Public Health í Bandaríkjunum, og doktorspróf í íþrótta- og heilsufræðum frá Háskóla Íslands. Hann starfaði við Háskóla Íslands og hjá Embætti Landlæknis áður en hann var ráðinn sveitarstjóri Norðurþings árið 2014. Kristján Þór er kvæntur Guðrúnu Dís Emilsdóttur fjölmiðlakonu og eiga þau þrjú  börn.

 

„Hér hefur orðið söguleg fjölgun íbúa á undanförnum árum vegna uppbyggingar iðnaðar hér í Þingeyjarsýslu, sveitarfélagið okkar er fjárhaglega betur statt, hér er atvinnulífið í mikilli sókn með tilkomu nýrrar stoðar á Bakka norðan Húsavíkur, ferðaþjónustan hefur eflst og ég horfi björtum augum til framtíðar svæðisins alls. Vitanlega eru áskoranirnar og úrlausnarefnin sem fyrr fjölmörg og þrátt fyrir mótbyr á svæðum sem standa höllum fæti þá hefur varnarbarátta margra undangenginna ára líka skilað árangri. Við þurfum að bæta ýmsa innviði byggðakjarnanna okkar sem og hlúa þarf vel að tækifærunum í dreifbýlinu þannig að þar blómstri atvinnulífið ekki síður. Ég óska eftir því að fá tækifæri til að vinna áfram að uppbyggingu samfélagsins og vil leiða öflugan hóp fólks til góðra verka.“

 

Í öðru sæti listans er Helena Eydís Ingólfsdóttir, verkefnastjóri hjá Þekkingarneti Þingeyinga og MPA í opinberri stjórnsýslu, í þriðja sæti er Örlygur Hnefill Örlygsson, forseti sveitarstjórnar og leiðbeinandi í leikskóla, og í fjórða sæti er Heiðbjört Ólafsdóttir, garðyrkjubóndi á Hveravöllum. 

 

1. Kristján Þór Magnússon, Húsavík.

2. Helena Eydís Ingólfsdóttir, Húsavík.

3. Örlygur Hnefill Örlygsson, Húsavík.

4. Heiðbjört Ólafsdóttir, Reykjahverfi.

5. Birna Ásgeirsdóttir, Húsavík.

6. Kristinn Jóhann Lund, Húsavík.

7. Stefán Jón Sigurgeirsson, Húsavík.

8. Jóhanna Kristjánsdóttir, Húsavík.

9. Hilmar Kári Þráinsson, Reykjahverfi.

10. Karólína Kristín Gunnlaugsdóttir, Húsavík.

11. Sigurgeir Höskuldsson, Húsavík.

12. Hugrún Elva Þorgeirsdóttir, Raufarhöfn.

13. Oddur Vilhelm Jóhannsson, Húsavík.

14. Kasia Osipowska, Húsavík.

15. Sigurjón Steinsson, Húsavík.

16. Elísa Elmarsdóttir, Húsavík.

17. Arnar Guðmundsson Húsavík.

18. Olga Gísladóttir, Öxarfirði.