Könnunarverðlaun Leifs Eiríkssonar veitt í fyrsta sinn

11. nóv

Könnunarverðlaun Leifs Eiríkssonar veitt í fyrsta sinn
Almennt - - Lestrar 331

Frá blaðamannafundinum í Könnunarsögusafninu.

Tilkynnt var um verðlaunahafa Könnunarverðlauna Leifs Eiríkssonar á blaðamannafundi á Húsavík í dag, en þetta er í fyrsta sinn sem verðlaunin eru veitt.

Frá blaðamannafundinum í morgun. Fv. Marina Rees, úr verkefnisstjórn Explorers Festival á Húsavík 2016,Örlygur Hnefill Jónsson, formaður stjórnar safnsins, Arnar Ómarsson, listrænn stjórnandi Explorers Festival á Húsavík 2016 og Örlygur Hnefill Örlygsson, safnstjóri.

Verðlaunin eru veitt í þremur flokkum og hlaut tunglfarinn Harrison Schmitt aðalverðlaunin fyrir rannsóknarvinnu sína á tunglinu árið 1972. Ólafur Ragnar Grímsson, forseti Íslands afhenti honum verðlaunin fyrir hönd safnsins er hann var hér á landi í sumar.

Ástralska siglingakonan Jessica Watson hlaut verðlaunin í flokki ungra landkönnuða undir 35 ára aldri fyrir 210 daga siglingu sína umhverfis hnöttinn á suðurhveli árið 2010, en hún lauk hringferð sinni þrem dögum fyrir 17 ára afmæli sitt. Er hún yngst til að hafa siglt umhverfis jörðina án þess að stöðva og án aðstoðar.

Í flokki sagnfræðinga hlaut verðlaunin Dr. Huw Lewis-Jones frá Bretlandi, en hann hefur skrifað fjölda bóka um könnunarleiðnagra og hefur í vinnu sinni lagt sérstaka áherslu á leiðangra um heimskautasvæðin. Mun hann leiða dómnefnd næstu verðlauna sem veitt verða haustið 2016. Aðrir meðlimir dómnefndar næsta árs voru jafnframt kynntir og eru það þau Air Trausti Guðmundsson, Francesco Perini, Giuditta Gubbi og Vilborg Arna Gissurardóttir. Verða verðlaun næsta árs afhent í loks þriggja daga hátíðar sem fram fer á Húsavík á næsta ári.

Í lok fundar var kynnt viðbygging við safnið og bygging eftirgerðar tunglferju, en hún verður afhjúpuð vorið 2019, en á því ári verða 50 ár frá fyrsta flugi tunglferju í Apollo 9 og jafnframt 50 ár frá lendingu Neil Armstrong og Buzz Aldrin á tunglinu í slíku fari. Er verkefnið unnið í samstarfi við geimfarana sjálfa sem eru mjög ánægðir að sjá þessari sögu haldið á lofti á Íslandi.

Harrison Schmitt og Hr. Ólafur Ragnar Grímsson.

"Sú reynsla sem Apollo geimfararnir fengu hér á Íslandi skipti sköpum í jarðfræðiþjálfun þeirra og rannsóknum á tunglinu. Fjölbreytt jarðfræði landsins líkist um margt flókinni jarðfræði yfirborðs tunglsins," sagði Harrison Schmitt, en hann er eini vísindamaðurinn sem hefur gengið á yfirborði tunglsins.

"Það var forvitnin sem dróg mig af stað í ferð mína umhverfis heimin. Ég vildi vita og sýna að ég gæti gert þetta. Ég vildi líka sýna hvað ungt fólk getur, sér í lagi ungar stelpur og konur," segir Jessica Watson, sem hlaut verðlaunin í flokki 35 ára og yngri.