Komu fyrir gestabók á KollufjalliAlmennt - - Lestrar 2984
Á kosningardaginn fór Ferðafélagið Norðurslóð í göngu upp á Kollufjall og kom þar fyrir gestabók.
Frá þessu segir á fréttasíðu Kópasker og nágrennis en Kollufjall hefur verið valið í verkefnið "Fjölskyldan á fjallið" þetta árið.
UMFÍ og HSÞ sem standa fyrir verkefninu og verður gestabókin í kassa sem er við vörðu á fjallstoppnum í allt sumar.
Af Kollufjalli er gott útsýni yfir Núpasveit, í vestri er Axarfjörðurinn/Öxarfjörðurinn og sést vel til Tjörness og Kinnafjalla. Í góðu skyggni er hægt að sjá allt vestur á Hornstrandir.
Í norðaustri og austri eru Leirhafnarfjöll og Hólaheiði.
Þetta er ekki erfið ganga, um 100 m hækkun og er fólk hvatt til að ganga í sumar upp á fjallið og skrifa nafn sitt í gestabókina.
Töluvert slagveður var á göngufólki en það lét veðrið ekki aftra sér og hér má sjá myndir sem Olga Gísladótti tók í ferðinni.