Hvalasafnið fær viðurkenningu

Einar Gíslason með viðurkenningarskjalið.

Mennta- og menningarmála-ráðherra, Illugi Gunnarsson, hefur að tillögu Safna-ráðs samþykkt að veita Hvalasafninu á Húsavík viðurkenningu fyrir árið 2014.

Viðurkenndum söfnum ber að starfa í samræmi við ákvæði safnalaga og hefur Safnaráð lögum samkvæmt eftirlit með safnastarfsemi í landinu.

Á heimasíðu Hvalasafnsins segir að þessi viðurkenning sé Hvalasafninu mjög mikilvæg og ákveðin gæðavottun á starfssemi safnsins.

Um viðurkenninguna segir Safnaráð að „markmiðið með viðurkenningunni er að efla starfssemi safna við varðveislu menningar- og náttúruarfs Íslands, tryggja að honum verið skilað óspilltum til komandi kynslóða, veiti fólki aðgang að honum og stuðla að aukinni þekkingu á þessari arfleifð og skilningi á tengslum hennar við umheiminn“.

Á meðfylgjandi mynd er framkvæmdastjóri safnsins, Einar Gíslason, með viðurkenningarskjalið.