Húsavík á kortið í alþjóðlegu strandhreinsunarátakiAlmennt - - Lestrar 260
Þann 14. júlí sl. tók hópur u.þ.b. 30 starfsmanna ferðaþjónustufyrir-tækja, stofnana og umhverfissamtaka þátt í alþjóðlegu strandhreinsunarátaki upphaflega skipulögðu af Ric O’Barry’s Dolphin Poject, bandarískum samtökum sem einblína á verndun höfrunga og hvala í höfum heimsins.
Að þessu sinni var farið að ósum Laxár í Aðaldal, í landi Laxamýrar með þátttöku landeigenda en þetta er í þriðja sinn sem fjörur eru gengnar í þessum tilgangi en þátttakan hefur aukist með ári hverju og er hópurinn nú orðinn fjölþjóðlegur. Í tilkynningu segir að með samstilltu átaki og góðri stemmningu hafi safnast um 600 kíló, hvar um 70% af því voru netadræsur og veiðarfæri.
Ruslinu var svo komið í viðeigandi flokkun og meðhöndlun með aðstoð og stuðningi Norðursiglingar og Íslenska Gámafélagsins.
Rusl í höfunum er talið bera ábyrgð á dauða nærri milljón sjávardýra á hverju einasta ári. Á Húsavík, sem víðar, er vaxandi áhugi á hafinu og umhverfi þess.
Þátttakendur í strandhreinsununni.
Þátttakendur að þessu sinni voru: Arctic Whale, Gentle Giants, Háskóli Íslands, Hvalasafnið á Húsavík, Ocean Missions, Salka, Saltvík, Whale Wise og Norðursigling en meðfylgjandi myndir eru fengnar af fésbókarsíðu NS.