HSÞ hlaut Fyrirmyndarbikar UMFÍ á Unglingalandsmótinu á Höfn

Þrír þátttakendur frá HSÞ með Fyrirmyndarbikarinn.

Héraðssamband Þingeyinga (HSÞ) hlaut Fyrirmyndarbikar UMFÍ í gærkvöldi en hefð er fyrir því við slit Unglingalandsmóts UMFÍ að veita bikarinn þeim sambands-aðila UMFÍ sem sýnt hefur verið til fyrirmyndar.

 Frá þessu segir á vef UMFÍ.

Haukur Valtýsson, formaður UMFÍ, sagði í ávarpi sínu við slit mótsins að þátttakendur og mótsgestir frá HSÞ hafi verið til fyrirmyndar á mótinu, bæði innan sem utan vallar, þar á meðal foreldrar þátttakenda. Þeir hafi auk þess sýnt jákvæða hvatningu og gengið vel um tjaldsvæði mótsgesta.

Gunnhildur Hinriksdóttir, framkvæmdastjóri HSÞ, tók við Fyrirmyndarbikarnum fyrir hönd sambandsins. Það er Íþróttanefnd ríkisins sem gefur bikarinn.

Við slit Unglingalandsmóts UMFÍ þakkaði Jóhanna Íris Ingólfsdóttir, formaður Ungmennasambandsins Úlfljóts, þátttakendum mótsins fyrir komu og sérstaklega öllum þeim sjálfboðaliðum sem lögðu hönd á plóg á mótinu sem fram fór á Höfn í Hornafirði um verslunarmannahelgina. Eftir að þjóðsöngurinn var spilaður og þátttakendum þakkað fyrir komuna var flugeldum skotið á loft. 

Þrír þátttakendur frá HSÞ hampa hér stoltir bikarnum. 

Ljósmynd umfi.is