Hraustar fjölskyldur, fjölbreytni og jafnrétti
X-S, fyrir samfélagið allt!

Benóný Valur Jakobsson.

Áherslumál okkar S-lista fólks fyrir komandi kosningar leggjum við fram undir kjörorðinu „Hraust Samfélag“.

Samfélag þar sem jafnrétti, jafnt aðgengi og möguleikar til leiks og starfa fara ekki eftir efnahag eða fjölskylduaðstæðum heldur standi samfélagið vörð um að allir ungir sem aldnir hafa fjölbreytt og góð tækifæri til að vaxa og þroskast. Fjölbreytt menning, listir og lýðheilsa skipa stóran sess í okkar áherslum og viljum við þjóna öllum samfélagshópum jafnt og vel. Við viljum að fólkið okkar hafi jöfn tækifæri og blómstri í leik og starfi. Aðaláherslumál okkar í þessum málaflokki eru eftirfarandi.

Við á S-listanum trúum á jöfnuð sem tæki til að gera allt samfélagið sterkara. Grunnþáttur jafnréttis er að börnin okkar sitji við sama borð og þeim sé aldrei mismunað vegna stöðu foreldra sinna. Við ætlum að lækka gjald fyrir skólamáltíðir í leik- og grunnskólum sveitarfélagsins í 250 krónur, strax í haust. Við teljum mikilvægt að koma til móts við efnaminni fjölskyldur með þessum hætti og auka þannig jöfnuð í samfélaginu öllu. Lauslega reiknað myndi þetta úrræði spara fjölskyldu með þrjú börn 100-150 þúsund krónur á ári. Því væri þetta mikil kjarabót fyrir fjölskyldur í sveitarfélaginu okkar. 

Ekki er síður mikilvægt fyrir samfélagið að hafa fjölbreytta og skemmtilega afþreyingu fyrir alla íbúa, þá sérstaklega unga fólkið okkar. Í hjarta æskulýðsstarfa Húsavíkur stendur verulega vannýtt hús, Tún, sem býður upp á spennandi tækifæri fyrir samfélagið en við stefnum að því að byggja þar upp miðstöð afþreyingar, menningar og fjölbreytni. Við sjáum fyrir okkur fjölnota frístundamiðstöð þar sem fólk á öllum aldri getur komið saman í þeirri afþreyingu sem þeim líkar. Börn og unglingar hér fá með þessu frábæra félagsmiðstöð tengda skólastarfinu og afþreyingu þegar því starfi lýkur. Möguleikarnir eru endalausir, við eigum ótrúlega mikið af hæfileikaríku fólki sem vantar stað til að rækta sína hæfileika og viljum við hjálpa þeim öllum að blómstra. Leiklistarnámskeið, æfingaaðstaða fyrir tónlistarfólk, danskennsla og margt fleira er það sem við sjáum fyrir okkur í Túni. 

Norðurþing hefur alið af sér stórkostlegt tónlistafólk sem er frægt um land allt og þótt víða væri leitað. Við viljum halda í þessa menningu og þetta einkenni sveitarfélagsins með styrkingu við þennan hóp. Listir og menning eru einn mikilvægasti partur hvers samfélags og sjáum við mörg góð tækifæri í þeim málaflokkum hér í Norðurþingi. Hér er skortur á fjölbreyttum tækifærum, meðal annars fyrir þá sem vilja vinna með höndunum og væri vel hægt að gera líka svokallaða „mótorsmiðju“ þar sem duglegt fólk getur komið saman og unnið.

Í dag er starfrækt góð félagsmiðstöð fyrir börn og unglinga sem myndi eignast framtíðarheimili í Túni. Að ógleymdri Miðjunni sem sinnir hæfingu og dagþjónustu fyrir fatlaða, fólk með þroskahamlanir og þá sem glíma við geðraskanir. Þetta er gríðarlega mikilvægt starf sem hefur ekki fengið þann stöðugleika sem það á skilið. Við sjáum fyrir okkur framtíðarheimili fyrir þessa þjónustu í Túni. Þessi þjónusta er ómetanleg fyrir þá sem hana nota og aðstandendur þeirra, því viljum við tryggja framtíð þessa starfs i öruggum höndum sveitarfélagsins. Við ættum öll að taka einkunnarorð Miðjunnar okkur til fyrirmyndar, Virðing, vinátta og vellíðan.

Húsið á einnig langa og merkilega sögu, en það var reist fyrir yfir 60 árum og hefur sinnt hinum ýmsu hlutverkum. Tún var embættisbústaður og sýsluskrifstofa lengi vel og væri glapræði að missa lóðina sem húsið stendur á úr höndum sveitarfélagsins.

Við gerum okkur grein fyrir því að þetta er umfangsmikið og kostnaðarsamt verkefni en ef einhver á það skilið, þá er það samfélagið okkar.

Að lokum.

Samfylkingin stendur fyrir jafnrétti, jöfn tækifæri og almannahag fyrst og fremst. Áherslumál okkar taka mið af þeirri stefnu og við munum ávallt standa upprétt í baráttunni fyrir þeim gildum sem við trúum á og teljum samfélaginu fyrir bestu.  Stefnumál okkar í heild sinni má finna á vefsíðu okkar, https://xsnordurthing.is og í bæklingi sem er kominn í dreifingu.

Benóný Valur Jakobssson skipar 2. sæti S- lista Samfylkingar og annars félagshyggjufólks