Höfðinglegt framlag

Heilbrigðisstofnun Norðurlands á Húsavík fær gjarnan góðar gjafir. Margar þeirra hafa borist í gegnum Styrktarfélag Heilbrigðisstofnunar Þingeyinga. Í vikunni barst sjóðnum höfðinglegt framlag og jafnframt úthlutað úr sjóðnum.

Sigurvaldi Guðmundsson sem býr á Skógabrekku eða öldrunardeild stofnunarinnar gaf styrktarsjóðnum eina milljón króna. Sigurvaldi er Húnvetningur en fluttist frá Reykjavík í Skógarbrekku til að eyða ævikvöldinu hér.

Þau hjón Kjartan Jóhannesson og Kristín A. Þórðardóttir kennd við Þórðarstaði á Húsavík búa einnig á Skógarbrekku. Þau færðu á sínum tíma sjóðnum gjafafé. Hluti þess fés var notað til að kaupa 65 tommu snjallsjónvarp auk þess spjaldtölvu og þráðlaust hljóðkerfi.

Auður Gunnarsdóttir formaður stjórnar Styrktarsjóðsins veitti Sigurvalda viðurkenningu og afhenti formlega öldrunardeildinni tækin fyrir gjafafé Kjartans og Kristínar. Auður sagði að því tilefni að framlög sem þessi væri starfsemi Heilbrigðisstofnunarinnar á Húsavík afar mikilvægar. Ásgeir Böðvarsson, læknir færði Sigurvalda og þeim hjónum hinar bestu þakkir fyrir framlagið.

Jóhanna Sigurðardóttir, iðjuþjálfi sem starfar á Skógarbrekku segir að tækin muni nýtast vel og viðhalda færni heimilisfólks á mörgum sviðum. „Hægt er að fara í ýmsa leiki og gera hvers konar æfingar og því ljóst að þessi búnaður nýtist bæði við dægradvöl og þjálfun“, segir hún. Jóhanna segir að setustofa heimilisfólks sé stór og mikilvægt að allir sjái á skjáinn, „enda leikur á sunnudaginn sem allir þurfa að upplifa og sjá“, bætir hún við. Tækin verða markvisst notuð til að vinna með minningar og sýna myndir og myndbrot með tónlist enda hljóðkerfið sérhannað fyrir heyrnadaufa.

Kristín hafði á orði að hún vonaðist til að tækin nýtist vel. En að lokinni afhendingu var öllu heimilis- og starfsfólki og gestum boðið upp á kaffi og dýrindis meðlæti.

Kristín og Kjartan ásamt Jóhönnu Svövu, Auði, Ásgeiri, Hallgrími Hreiðarssyni, lækni, Kristínu Arinbjarnardóttur, gjaldkera Styrktarsjóðsins og Jóhönnu Kristjánsdóttur, deildarstjóra á öldrunardeild, Skógabrekku.

Kristín og Kjartan við skjáinn góða

Sigurvaldi (t.h.) ásamt Ásgeiri.