Hinrik Wöhler ráðinn forstöðumaður Húsavíkurstofu

Hinrik er með B.Sc. í viðskiptafræði frá Háskólanum í Reykjavík og M.Sc. í markaðsfræði frá viðskiptaháskólanum í Kaupmannahöfn, þar sem hann sérhæfði sig í ímyndarsköpun og markaðssetningu landssvæða. Hann er nýfluttur frá Danmörku en þar á undan starfaði hann hjá Íslandsbanka, VÍS og tækniháskólanum í Queensland í Ástralíu.

Í tilkynningu segir að starf Hinriks muni meðal annars felast í markaðssetningu á vörumerkjum Húsavíkurstofu, aðstoð við markaðssetningu Húsavíkurhafnar fyrir skemmtiferðaskip og að sjá um markaðsherferðir fyrir innlenda og erlenda ferðamannamarkaði. Hann mun einnig leggja sitt af mörkum við það að efla verslun í heimabyggð og hvetja íbúa til að nýta sér þá þjónustu sem er í nærumhverfinu henni til stuðnings.

Það þarf vart að fara mörgum orðum um það mikla krísuástand sem skapast hefur í þjóðfélaginu vegna Covid-19 heimsfaraldursins sem nú ríkir. Ljóst má vera að ferðaþjónusta sé meðal þeirra atvinnugreina sem verst fara úr krísunni enda lokað fyrir ferðalög í tíma sem enginn veit nákvæmlega hversu langur verður. Vonandi horfir þó til betri vegar að nokkrum vikum liðnum. Húsavíkurstofa mun sinna markaðssetningu af krafti og vera undirbúin þegar ferðamenn verða tilbúnir að bóka ferðalög á nýjan leik.

Það er enginn vafi í huga stjórnar Húsavíkurstofu að ferðaþjónusta hér á svæðinu muni rísa upp úr lægðinni, sterkari sem aldrei fyrr. Gæði þjónustu og fjölbreytni náttúrunnar í Þingeyjarsýslum gerir það að verkum að svæðið er í kjörstöðu til að vera spennandi kostur í augum ferðamanna sem vafalaust munu halda af stað í sín frí þegar að færi gefst.

Stjórn Húsavíkurstofu býður Hinrik velkominn til starfa.