Helgin framundan frumsýnd í dag

02. nóv

Helgin framundan frumsýnd í dag
Almennt - - Lestrar 294

Bergdís Jóhannsdóttir og Arnar Pálmi Kristjánsson.

Það er frumsýningardagur á Húsavík í dag en leikfélag FSH, Píramus og Þispa frumsýna leikritið Helgin framundan í Samkomuhúsinu kl. 16:00.

Jóhann Kristinn Gunnarsson leikstýrir verkinu sem hann samdi á sínum tíma með Kristjáni Þór Magnússyni.

Jói skrifaði eftirfarandi línur á Fésbókarvegg sinn í dag og leyfði 640.is að endurbirta.

"Fyrir 16 árum síðan fékk Píramus og Þispa, leikfélag Framhaldsskólans á Húsavík, okkur Kristján Þór Magnússon til að vinna með þeim að uppsetningu leiksýningar. Hugmyndin þeirra var að gera einhvers konar forvarnarverkefni sem átti samt að vera skemmtilegt og jafnvel pínu fyndið. Þetta var svo styrkt af forvarnarhópi sem starfaði í þá daga á vegum bæjarins.

Við fengum meistara Guðni Bragason til að gera plaback af 4 þekktum lögum og sjá um tónlistina í verkinu. Það hitti auðvitað í mark og varð svo fullkomnað þegar við fengum náttúruskáldið Hörður Þór Benónýsson til að gera íslenska texta við lögin. Algjörlega magnað hjá þessum snillingum.

Leikhópurinn var svo alveg magnaður og þessi tími gleymist aldrei. Margir fóru á þvílíkum kostum að enn er verið að rifja það upp. Í uppsetningunni í dag notum við 3 af textum Harðar en ég þurfti að bæta einum við þar sem eitt lagið var ansi strembið. Það var ekki mikið mál fyrir Guðna að henda í eitt playback í viðbót og ekki var það að af verri endanum. Don´t stop me now með Queen!

Við skrifuðum s.s. leikrit ofan í 17 áhugasama leikara og settum upp í ársbyrjun 2004. Það gerði mikla lukku og sáu þetta um 650 manns. Forvarnarþátturinn þótti góður og verkið nokkuð skemmtilegt fyrir alla aldurshópa. Foreldrar fengu fínan punkt til að fara með heim og ræða við börnin og unglingana.

Í haust bað sama leikfélag mig um að dusta rykið af þessu og setja upp aftur. Enda á þetta í rauninni alltaf vel við. Leikhópurinn í ár er algjörlega magnaður og ég veit að margir eiga eftir að koma vinum sínum og fjölskyldu mikið á óvart í Leikhúsinu. Ég fékk Guðna Braga aftur með mér í þessa uppsetningu og Ólafur Freyr Jónasson á ljósin.

Það er gríðarlega þægilegt að hafa svona menn með sér sem vita nákvæmlega hvað þeir eru að gera og maður þarf í rauninni ekkert að skipta sér af. Ég ákvað að leita til bekkjarbróður míns sem er alveg ótrúlegur listamaður með að gera lógó sem hentaði þessu verki. Hann henti í þetta lógó sem þið sjáið á auglýsingunum. Baldur Kristjáns er galdramaður með höndunum eins og sést. Annar æskuvinur Röðull Reyr Kárason setti þetta svo upp fyrir leikfélagið og hannaði auglýsingarnar með lógói Baldurs.

Þetta er því 100% framleiðsla í heimabyggð frá a-ö! Gaman að því.

Þó uppsetningin og leikhópurinn hafi verið stórkostlegur árið 2004 þá held ég svei mér þá að við séum að toppa þetta núna. Leikarar eru að fara á kostum og sagan vellur ljóslifandi út í salinn í Gamla Samkomuhúsinu okkar.

Ég er með frumsýningar fiðring í maganum en það virðist aldrei hverfa. Ég er ánægður með hópinn og hvernig til hefur tekist og ég vona svo innilega að krakkarnir fái góða mætingu á þessar sýningar. Þau eiga það alveg inni. Hafa unnið verulega fyrir því.

Aðeins verður hægt að sýna þetta 6 sinnum. Ekki bíða og sjá til. Pantið miða strax. Það eru til einhverjir miðar á frumsýningna núna kl.16:00! Frumsýning er alltaf skemmtilegasta sýningin!

Sjáumst öll í leikhúsinu!" Skrifaði Jói en meðfylgjandi myndirnar tók ljósmyndari 640.is á æfingu í vikunni.