Glæsilegt Íslandsmót í boccia á 90 ára afmælisári Völsungs

Eins og áður hefur komið fram á 640.is var haldið Íslandsmót í Boccia um síðustu helgi á Húsavík.

Um var að ræða einstaklingskeppni og mættu hátt á annað hundrað keppendur til leiks í íþróttahöllinni og voru gestir allt að 250.  

Mótið hófst á föstudagsmorgun með veglegri mótsetningu þar sem fulltrúar frá 15 íþróttafélögum marseruðu í salinn undir traustri stjórn Ingólfs Freysonar. 

Formaður Bocciadeildar Völsungs, Egill Olgeirsson, bauð keppendur og gesti velkomna, þá ávarpaði Kristján Þór Magnússon sveitarstjóri Norðurþings gestina og bauð þá velkomna til Húsavíkur, að lokum ávarpaði formaður ÍF, Þórður Á Hjaltested, mótsgesti og setti Íslandsmótið 2017. 

Fram kom í ávarpi formanns deildarinnar að það væri mikil áskorun að vera falið þetta stóra og krefjandi verkefni á 90 ára afmælisári Íþróttafélagsins Völsungs, en þetta mót væri framlagi Bocciadeildarinnar í röð íþróttaviðburða á glæsilegu afmælisári Völsungs. 

Mótstjóri var Egill Olgeirsson og yfirdómari Anna María Þórðardóttir bæði úr stjórn Bocciadeildar Völsungs. Dómgæslan var í höndum félaga úr Kiwanisklúbbnum Skjálfanda sem ætið hafa verið reiðubúnir að aðstoða Bocciadeildina á öllum mótum frá upphafi, fengu þeir  sér til aðsoðar nemendur úr Framhaldsskóla Húsavíkur og 10.bekk Borgarhólsskóla, einnig bocciafólk úr Félagi eldri borgara og ýmsa fleiri. 

Keppt var í fimm deildum  í almennum flokki fatlaðra, fötlunarflokki BC1-4 og í rennuflokki. Keppt var á föstudag og laugardag, voru það langir og strangir keppnisdagar, fyrst riðlakeppni og svo úrslit á laugardag. Að keppni lokinni fór svo fram vegleg verðlaunaafhending í öllum deildum og flokkum. 

Úrslit urðu:

1. deild 1. sæti og Íslandsmeistari,

Guðmundur Örn Björnsson, Þjóti

2. sæti: Sverrir Sigurðsson, Völsungi

3. Sæti: Kristín Ólafsdóttir, Eik

Með þeim á myndinni eru Þórður Á Hjaltested formaður ÍF og Anna María Þórðardóttir yfirdómari mótsins.

2. deild

1. sæti: Sigurður Ragnar Kristjánsson, ÍFR

2. sæti: John William Boyd, Nes

3. Sæti: Jósef W. Daníelsson, Nes

3. deild

1. sæti: Ragnar Lárus Ólafsson, Nes

2. sæti: Ylfa Óladóttir, Ægir

3. Sæti: Kristófer Fannar Sigmarsson, Eik

4. deild

1. sæti: Sigríður Karen Ásgeirsdóttir, Nes

2. sæti: Arnar Már Ingibergsson, Nes

3. Sæti: Thelma Rut Gunnlaugsdóttir, Nes

5. deild

1. sæti: Steinunn María Þorgeirsdóttir, Eik

2. sæti: Erla Björk Sigmundsdóttir, Gný

3. Sæti: Telma Þöll Þorbjörnsdóttir, Suðra

Rennuflokkur

1. sæti: Kristján Vignir Hjálmarsson, Ösp

2. sæti: Bernharður Jökull Hlöðversson, Ægir

3. Sæti: Ástvaldur Ragnar Bjarnason, Nes

BC 1 til 4

1. sæti: Ingi Björn Þorsteinsson, ÍFR

2. sæti: Aðalheiður Bára Steinsdóttir, Grósku

3. Sæti: Aneta Beata Kaczmarek, ÍFR

Öll verðlaun voru gefin af Lionsklúbnum Viðari í Reykjavík. Að lokinni verðlaunaafhendingu sleit formaður ÍF mótinu. Við það tækifæri kallaði hann upp Svanhildi Þorleifsdóttu og veitti henni viðurkenningu fyrir mikið og óeiingjarnt starf í þágu íþróttastarfs fatlaðra á Húsavík. Hún væri verðugur fulltrúi þeirra sem ynnu störfin í grasrótinni, en Svana hefur staðið vaktina í veitingasölu deildarinnar á öllum mótum frá upphafi og alltaf verið tilbúin þegar til hennar hefur verið leitað og beðin að vinna fyrir Bocciadeildina, Þá þakkaði hann mótshöldurum fyrir frábært mót, góðan undirbúning og skipulag og framkvæmd alla sem tekist hefði einstaklega vel. 

Að venju eftir stranga og langa keppnisdaga var svo á laugardagskvöldinu haldið glæsilegt lokahóf  að Ýdölum. Kvenfélag Aðaldæla annaðist allar veitingar og bauð upp á dýrindis lambasteik, kaffi og kökur á eftir. Guðni Braga var veislustjóri og stýrði samkomunni með miklum glæsibrag, síðan var dansað fram eftir kvöldi við undirleik hljómsveitar Guðna Braga og félaga,

Til að lítið félag eins og Bocciadeild Völsungs geti tekið að sér svona stórt og krefjandi verkefni að standa fyrir íslandsmóti, þarf að leita til margra um stuðning og aðstoð, bæði einstaklinga, félaga og fyrirtækja. Án mikils velvilja og góðrar aðstoðar nærsamfélagsins væri þetta ekki mögulegt. 

Bocciadeild Völsungs vill þakka öllum þeim fjölmörgu sem lögðust á eitt með okkur, aðstoðuðu  og styrktu á margvíslegan hátt.

EO

Sverrir Sigurðsson Völsungi lék til úrslita í 1. deild og hér kastar hann boltanum.

Steinunn María úr Eik og Erla Björk úr Gný spiluðu til úrslita í 5. deild og hafði Steinunn sigur. Hér á Erla Björk leik.

Með því að smella á myndirnar er hægt að fletta þeim og skoða í stærri upplausn.