Gamla myndin - Sungu lög úr Vesalingunum í sal Borgarhólsskóla

Sungin lög úr Vesalingunum í sal Borgarhólsskóla.

Gamla myndin er eitthvað sem mætti birtast oftar á 640.is en hér kemur þó ein.

Hún var tekin þann 23. nóvember 2004 þegar um sjötíu manns tóku þátt í stórsýningu á vegum Tónlistarskóla Húsavíkur í sal Borgarhólsskóla.

Þar var um að ræða flutning helstu laga úr söngleiknum Vesalingunum eftir þá Alan Boublil og Claude-Michel Schönberg.

Frá þessu sagði í Morgunblaðinu:

Húsavík | Um sjötíu manns tóku þátt í stórsýningu á vegum Tónlistarskóla Húsavíkur í sal Borgarhólsskóla á dögunum. Þar var um að ræða flutning helstu laga úr söngleiknum Vesalingunum eftir þá Alan Boublil og Claude-Michel Schönberg. Söngleikinn er byggður á samnefndri skáldsögu eftir Victor Hugo. 

Leikstjóri sýningarinnar var María Sigurðardóttir, söngstjóri Hólmfríður Benediktsdóttir sem jafnframt söng eitt hlutverk og tónlistarstjóri var Aladár Racz. Aladár sá einnig um píanóundirleik í sýningunni og með honum spiluðu þeir Guðni Bragason, Ágúst Guðmundsson og Gudio Bäumer. Um lýsingu sá Erling Þorgrímsson.

María Sigurðardóttir segir í leikskrá að hugmyndin að því að færa Vesalingana á svið hafi kviknað síðastliðinn vetur. "Í fyrstu fannst mér hugmyndin óskaplega spennandi en síðan fóru að renna á mig tvær grímur, hvar ætti ég að fá söngvara til að syngja þessi erfiðu hlutverk, hvar ætti ég að fá risakóra. En af því við Hólmfríður höfum alltaf verið of vitlausar til að skilja að það er ekki hægt að gera allt sem við viljum hér fyrir norðan, þá ákváðum við bara að kýla á þetta. Við fengum Aladár í lið með okkur og hófum að leita að söngvurum. Það gekk ótrúlega vel að sannfæra óskasöngvarana um að það væri nú snjallt að taka þátt í þessu," skrifar María. 

Auk einsöngvaranna tóku Samkór Húsavíkur og Stúlknakór Húsavíkur þátt í sýningunni. Þeir sem tóku þátt í sýningunni komu víða að úr Þingeyjarsýslum en með helstu hlutverk fóru Baldvin Kr. Baldvinsson, Kristján Þ. Halldórsson, Dóra Ármannsdóttir, Judit György, Ásta Magnúsdóttir og Kristján Halldórsson. Þingeyingar tóku sýningunni vel og var uppselt á sex sýningar, þannig að tæplega sex hundruð manns sáu verkið.