Gamla myndin - Jónsmessuganga á Höfðagerðissand

Varðeldurinn logaði glatt í fjörunni.

Gamla myndin að þessu sinni er frá Jónsmessugöngu sem farin var um Jónsmessuna árið 2002.

Þá stóðu LC-konur á Húsavík fyrir Jónsmessugöngu og var gengið sem leið lá frá Gónhól að Eyvíkurfjöru eða Höfðagerðissandi sem fjaran heitir réttu nafni.

Veðrið var eins og best var á kosið og lék við göngufólkið sem var á öllum aldri eins og sagði í Morgunblaðinu sem birti frétt um gönguna.

Þar sagði einnig:

Um 80 manns tóku þátt í göngunni og þegar í fjöruna var komið var buðu LC-konur upp á veitingar, kveiktur var varðeldur og sungið við gítarspil Sigurðar Illugasonar. Meðan þeir eldri sungu léku börnin sér í flæðarmálinu, reyndu m.a. að láta steinvölur fleyta kellingar og nutu sum þau yngri aðstoðar þeirra sem eldri voru.

Hvort það var söngurinn sem laðaði að aðra en göngufólkið sjálft skal ósagt látið en meðan á þessu stóð sást selur eða selir fylgjast með og tvær seglskútur komu siglandi inn með Tjörnesi áleiðis til Húsavíkur.

Varðeldurinn logaði glatt í fjörunni á Höfðagerðissandi. Sólarlagið var ekki til að skemma stemninguna, Lundey í baksýn.