23. sep
Fréttaþulur BBC veitir landkönnunarverðlaun á HúsavíkFréttatilkynning - - Lestrar 668
Babita Sharma.
Landkönnunarhátíð á Húsavík hefur staðið síðustu 3 daga og verður hápunktur hátíðarinnar í dag þegar Landkönnunarverðlaun Leifs Eiríkssonar, Leif Erikson Exploration Awards, verða veitt í þriðja sinn.
Babita Sharma, fréttaþulur BBC World News mun kynna verðlaunin í dag, en síðustu tvö ár hafa tveir forsetar Íslands, Guðni Th. Jóhannesson og Ólafur Ragnar Grímsson, veitt verðlaunin fyrir hönd Könnunarsafnsins sem stendur að hátíðinni.
Í tilkynningu segir að þátttakendur í hátíðinni í ár séu meðal annara Alex Bellini sem fyrr á þessu ári fór yfir Vatnajökul og hefur m.a. farið einn í 227 daga róður yfir Atlantshafið, og Edurne Pasaban sem er fyrst kvenna til að klífa öll 14 fjöll heims yfir 8 þúsund metrum.
Verðlaunin hafa áður m.a. verið veitt Harrison Schmitt tunglfara, hinum Indversku Malik systrum, siglingakonunni Jessicu Watson sem fór 16 ára umhverfis hnöttin, og áhöfn Haraldar Hárfagra. Hátíðinni lýkur á morgun.
640.is á Facebook