Framsókn og lýðræðið – Allir með!

Heiðar Hrafn Halldórsson.

Það hefur varla farið framhjá mörgum að sveitarstjórnarkosningar verða haldnar um næstu helgi.

Áhugasamir íbúar hafa á undanförnum vikum getað sótt í beina eða óbeina pólitískt tengda afþreyingu daglega, hvort sem um er að ræða fræðslufundi, grillveislur, kvennakvöld eða málefnafundi. Hið síðastnefnda hefur ef til vill mesta pólitíska vigt enda framboðin þar að fara yfir stefnu sína sem skal gilda á næsta kjörtímabili. 

Góðir íbúafundir 

B listi Framsóknar og félagshyggju hóf sína stefnuvinnu snemma. Listinn var tilkynntur fyrstu helgina í mars og allar götur síðan hefur verið unnið ötullega að því að fullmóta gæði stefnunnar, með hagsmuni samfélagsins og heildarinnar í öndvegi. B listinn boðaði eitt framboða til íbúafunda víðsvegar í sveitarfélaginu, hvar íbúum gafst tækifæri á að koma með góðar ábendingar að þörfum atriðum sem bæta mætti í Norðurþingi. Þetta voru afar gagnlegir fundir sem hjálpuðu til við að móta heilsteypta stefnuskrá sem B listinn getur verið stoltur af.  Það má segja að þessi undirbúningsvinna hafi orðið lykillinn af slagorðunum okkar fyrir kosningarnar – „Allir með!“.

Aukið vægi hverfisráða

Framboði Framsóknar- og félagshyggju finnst íbúar þurfa að fá mun sterkari rödd í stjórnsýslunni. Þannig ætlum við okkur að efla vægi ungmenna- og hverfisráða, meðal annars með því að úthluta hverfisráðunum framkvæmdafé til ráðstöfunar á sínu svæði. Við viljum stofna öldungaráð sem sérhæfir sig í málefnum eldri borgara sveitarfélagsins. Íbúafundir skuli haldnir reglulega í sveitarfélaginu þar sem íbúum gefist tækifæri á að koma skoðunum sínum á framfæri og hafa þannig áhrif. Það var gert og gafst vel þegar Framsóknarflokkurinn leiddi meirihlutastarf. Þá skuli bæta upplýsingaveitu til nýbúa með sérstaka áherslu á erlenda ríkisborgara. Þannig geti nýbúar komist inn í samfélagið með mun hraðari hætti en áður og tekið virkan þátt í því frá degi eitt. Við sem fyrir erum þurfum að afhenda þeim lykil að samfélaginu og nýta hæfileika þeirra og menningu til að auðga okkar. 

Að nýta ávallt kosningaréttinn

Stjórnsýslan hefur ótal marga snertifleti. Við höfum öll skoðanir á mismunandi málefnum hennar og það er sjálfsögð krafa að íbúar fái tækifæri á inngripi oftar en rétt í aðdraganda kosninga. Þetta er ein af lykiláherslum B lista Framsóknar og félagshyggju í sveitarstjórnarkosningum Norðurþings 2018. Við hvetjum alla íbúa til að nýta atkvæðisrétt sinn á kjördag. Vertu með!

Heiðar Hrafn Halldórsson skipar 5. sæti á B- lista Framsóknar og félagshyggju í Norðurþingi.