Frábær dagur í Reyðarárhnjúk

Gaman saman á skíðum.

Hann var aldeilis frábær útivistardagurinn sem skíðaráð Völsungs stóð fyrir, í samvinnu við Björgunarsveitina Garðar, í Reyðarárhnjúknum í gær, annan dag páska.

Fjöldi fólks lagði leið sína upp eftir og var selflutt í björgunarsveitar-bílum frá veginum að rótum þessa frábæra skíðasvæðis sem hnjúkurinn er. 

Og þar sem engin er skíðalyftan voru björgunarsveitarmenn ásamt öðrum sleða- og jeppamönnum í því að draga fólkið upp í brekkurnar sem síðan renndi sér niður á skíðum, brettum, sleðum eða slöngum.

Skíðaráð vill koma á framfæri þökkum til bjögunarsveitarmanna og annarra sem lögðu þeim lið, án þeirra hefði þetta ekki verið hægt.

Um leið er ágætt að minna þá á sem styrkja vilja björgunarsveitina að margt smátt gerir eitt stórt.

Ljósmyndari 640.is fékk far með Steingrími Jónssyni (Steina í Skarði) á vélsleða upp á hnjúkinn og hér koma nokkrar myndir sem sýna stemminguna í gær. 

Með því að smella áþær er hægt að fletta þeim og skoða í stærri upplausn.