Fjölskyldudagur hjá björgunarsveitarfólki á Reykjaheiði

Það var frábært útivistarveður á heiðinni í dag.

Björgunarsveitin Garðar hefur af og til staðið fyrir fjölskyldudegi þar sem meðlimir sveitarinnar koma saman ásamt fjölskyldu og vinum og gera sér glaðan dag.

Sveitin stóð fyrir fjölskyldudegi á Reykjaheiði í dag þar sem veður var með eindæmum gott og fallegt yfir að líta. 

Búið var að troða suðurhlíðina í Reyðarárhnjúk og var sveitin með bíla, hjól og sleða á staðnum til að draga fólk upp brekkuna. Sömuleiðis voru meðlimir á einkasleðum. Boðið var upp á grillaðar pylsur og drykki og það var gott að setjast niður fá sér heitt kaffi til að ylja sér.

Dagurinn gekk ákaflega vel þrátt fyrir óhapp í brekkunni en þá var stutt í aðstoð.

Ljósmyndari 640 var á staðnum og fékk far upp í brekkuna og þaðan upp á topp til að mynda.

Nú látum við myndirnar tala sínu máli en með því að smella á þær er hægt að fletta þeim og skoða í stærri upplausn.