Fjaran, nýr fjölskyldurekinn veitingastaður við höfnina

Ásgeir, Anna, Þyri og Ingvar eigendur Fjörunnar.

Sl. sunnudag opnaði Fjaran, nýr veitingastaður við höfnina á Húsavík.

Fjaran er fjölskyldurekinn veitingastaður í eigu Ásgeirs Kristjánssonar, Önnu Ragnarsdóttur, Þyriar Kristjánsdóttur og Ingvars Hafsteinssonar.

Yfirmatreiðslumaður er Theodór Páll Theodórsson sem undanfarin ár hefur verið yfirmatreiðslumaður á  Hótel Reynihlíð og veitingastjóri er Birna Ásgeirsdóttir.

Á Fjörunni verða sjávarréttir í öndvegi en bland við kjötrétti. Áhersla verður lögð á upplifun, einfaldleika í eldamennsku og ferskleika hráefnisins. Hefð er fyrir mikilli framleiðslu úrvals hráefnis í héraði, það mun Fjaran notfæra sér og bjóða upp á það besta.

Hægt verður að taka á móti litlum og meðalstórum hópum í mat auk gesta sem koma beint af götunni enda iðar hafnarsvæðið á Húsavík af mannlífi á sumrin og er lífæð bæjarins.

Yfir vetrartímann verður hægt að leigja húsnæðið bæði fyrri litla og stærri viðviðburði. Einnig hugsa eigendur sér vetraropnun fyrir matsölu en ennþá er ekki ákveðið með hvaða móti það verður.

Breytingar á húsnæðinu, sem stendur við Naustagarð 2 og var upphaflega verkstæðishús við slippinn, hófust í lok janúar sl. og fólust í því að hreinsa nánast allt út úr húsnæðinu og stækka alla aðstöðu til muna.

Í húsnæðinu hafði verið veitingastaður sem tók um 30 manns í sæti. Litli veitingasalurinn var látinn halda sér og snyrtingar einnig og eftir stækkun tekur Fjaran 150 manns í sæti.

Hannað var nýtt eldhús í húsinu og voru fagaðilar frá Fástus fengnir til verksins. Eldhúsið er einstaklega vel hannað og gert í samráði við kokka sem þekkja til og vita hvað vel hannað eldhús skiptir miklu máli.

Að sögn Önnu Ragnarsdóttur unnu eigendur, vinir og vandamenn að mestu að þessum breytingum en einnig voru fagaðilar héðan frá Húsavík fengnir til verksins.

Eigendur þakka allan þann hlýhug og hvattningu sem þau hafa fengið frá bæjarbúum á meðan á uppbyggingunni stóð og vonast til þess að staðurinn eigi eftir að verða skemmtileg viðbót við mannlífsflóruna í bænum.

Ásgeir Kristjánsson, Anna Ragnarsdóttir, Þyri Kristjánsdóttir og Ingvar Hafsteinsson eigendur Fjörunnar.

Birna Ásgeirsdóttir veitingastjóri dælir einum köldum í glas.

Theodór Páll Theodórsson yfirmatreiðslumaður Fjörunnar.

Ásgeir Kristjánsson, Kristján Eiðsson og Björn Ragnarsson létu hendur standa fram úr ermum við breytingar á húsnæði Fjörunnar.

Fjaran tekur 150 manns í sæti.

Veitingastaðurinn Fjaran Naustagarði 2