Evrópuleikar Special Olympics í Belgíu

Húsvíkingarnir á Special Olympics.

Tuttugu og níu keppendur frá Íslandi tóku þátt í Evrópuleikum Special Olympics  dagana 13. - 21. september sl. en þeir voru haldnir í Antwerpen í Belgíu.

Eins og áður hefur komið fram átti Völsungur einn fulltrúa á leikun-um en það var hún Sylgja Rún Helgadóttir.

Sylgja keppti í Bocce sem er mjög svipað Boccia nema þar er keppt með stærri kúlur á teppalögðum völlum. Ísland keppti í liðakeppni og svo í tvímenningi.

Sylgja Rún Helgadóttir.

Sylgja Rún og keppnisfélagar hennar ásamt Önnu Maríu þjálfara á verðlaunaafhendingunni.

Liðið hennar Sylgju lenti í þriðja sæti í sínum styrkleikaflokki sem er frábær árangur. Síðan hafnaði hún ásamt Guðnýju Tómasdóttur í 5. sæti í tvímenn-ingi. Liðsfélagar hennar, Birgir Örn Viðarsson og Eðvard Sigurjónsson höfnuðu í 2.sæti í sínum styrkleika flokki.



Jónas Björnsson t.h á myndinni er ættaður frá Húsavík og úr Kelduhverfinu. 

Sylgja Rún var nú ekki eini Húsvíkingurinn í ferðinni en Jónas Björnsson, sonur Herdísar Hreiðarsdóttur og Björns Jónassonar, keppti í fótbolta og höfnuðu þeir í 4.sæti í sínum styrkleika flokki og svo var náttúrlega Anna Karólína Vilhjálmsdóttir einn af aðalfararstjórunum í ferðinni.



Húsvíkingarnir á Special Ólympics 2014, fv. Sylgja Rún Helgadóttir, Anna Karólína Vilhjálmsdóttir, Anna María Þórðardóttir.

Íslenski hópurinn bjó í Kortrijk 9. - 13. september en Kortrijk var valinn vinabær Íslands. Við komuna til Kortrijk var haldin móttaka í ráðhúsinu þar sem borgarstjóri ávarpaði hópinn og afhenti gjöf til sendiherra Íslands í Brussel, Bergdísar Ellertsdóttur. 

Það var alveg einstak að upplifa gestreisnina og velvildina í okkar garð, allir boðnir og búnir að gera þessa daga ógleymanlega. Það er ekki sjálfgefið að fólk opni hemilin sín fyrir ókunnugu fólki í fjóra daga en við Bocce-hópurinn gistum öll fimm talsins hjá yndislegum hjónum sem allt vildu fyrir okkur gera og mynduðu keppendur og fararstjórar bönd við sínar host-fjölskyldur um ókomna tíð.

  

Sylgja Rún og Birgir með kyndilinn ásamt Guðmundi Sigurðssyni en hann og Gunnar Schram eru fyrstu íslensku lögreglumennirnir til að hlaupa með Ólympíueldinn.

Hlaupið með ólympíueldinn í miðbæ Kortrijk.


Þann 12. september var gífurleg stemming í Kortrijk þegar lögreglumenn víða að úr Evrópu komu hlaupandi gegnum  bæinn með eld leikanna og haldin var hátíð í miðbænum í tilefni þessa. Nokkrir keppendur hlupu með lögreglunni en aðrir tóku á móti þeim í miðbænum. Hlaup lögreglumann endaði á Opnunarhátíðinni þann 13. september.

Ólympíueldurinn tendraður.

Eldurinn var tendraður í Olympíu í Grikklandi og logaði meðan leikarnir stóðu yfir. Lögreglumenn hlaupa ávallt með eld leikanna á alþjóða og Evrópuleikum og nú voru í fyrsta skipti íslenskir lögreglumenn í hópnum, þeir Guðmundur Sigurðsson og Gunnar Schram lögreglumenn af Suðurnesjum. Það var ólýsanleg tilfinning að sjá þá koma með eldinn inn í miðbæ Kortrjik við þvílíkan fögnuð áhorfenda sem taldir voru í þúsundum.

Íslendingarnir á opnunarhátíðinni í Brussel.



Eftir dvöl okkar í Kortrijk var haldið til Brussel þar sem opnunarhátíðin fór fram og var hún hin glæsilegasta og var það drottning Belga, Mathilde sem setti leikana. Hópurinn hélt svo til í Mol en þar er sumarleyfisstaður sem var nýttur sem ólympíuþorp á meðan leikunum stóð.

Allar greinar fóru svo fram í Andwerpen nema fjálsar og þurftu því flestir að ferðast með rútu í einn og hálfan tíma á keppnistað. Þetta þýddi að keppendur og þjálfarar voru að byrja daginn kl.06:00 til þess að ná í morgunmat og á keppnisstað á réttum tíma.



Ég er gífurlega þakklát fyrir að hafa verið valin til að fara sem þjálfari og fá að upplifa Special Olympics. Að sjá sigrana sem allir voru að vinna innan sem utan vallar er ólýsanlegt og lífsreynsla sem ég mun búa að ævilangt.

Anna María Þórðardóttir.

Aðeins um Special Olympics

:

Special Olympics samtökin voru stofnuð af Kennedy fjölskyldunni árið 1968. Auk íþróttaviðburða starfa samtökin markvisst að því að efla og bæta lífsgæði fólks með  þroskahömlun. Skráðir iðkendur eru nú um 4 milljónir

 en 2000 keppendur frá 58 löndum mættu á Evrópuleikana en keppt var í 10 greinum. Alls voru þar um 4000 sjálfboðaliðar og áhorfendur voru um 40.0000.   



Áhrif leikana á keppendur:


Sjálfsmyndin styrkist þegar keppt er við jafningja – ný reynsla fyrir marga

Hefðbundið pýramídakerfi íþróttanna er sett til hliðar og allir fá tækifæri

Íþróttahreyfingin á Íslandi og alþjóðavettvangi byggir nær alfarið á þeirri reglu að pýramídakerfi ráði, þar sem þeir bestu sigra og hljóta verðlaun.  Þrátt fyrir að Íslendingar hafi farið á leika Special Olympics allt frá árinu 1989 er ennþá erfitt að útskýra þann mun sem er á leikum Special Olympics og Paralympics, eða ólympíumóti fatlaðra þar sem aðeins örfáir Íslendingar ná lágmörkum hverju sinni.

Keppendur eru með þroskahömlun en einnig hefur verið sett á keppni sem byggir á þátttöku fatlaðra og ófatlaða – unified sport –.



Þegar valið er á leika Special Olympics er lögð áhersla að meta ákveðna þætti s.s.  mætingu, frammistöðu, bætingu og ekki síst framkomu. Það eru því ekki endilega þeir sem hafa náð besta árangri sem eru tilnefndir á leikana frá aðildarfélögum ÍF.



Fyrstu dagar leikanna fara í undankeppni þar sem lagt er mat á stöðu hvers einstaklings eða liðs og í framhaldi af því eru settir upp úrslitariðlar þar sem jafningjar keppa saman oftast í ákveðnum aldursflokkum. Í kjölfarið fer keppni af stað og allir fá verðlaun, fyrstu þrír fá verðlaunapeninga og aðrir fá verðlaunaborða.  



Það sem einkennir stemminguna á Special Olympics leikum er að enginn er öruggur með sigur. Sá sem hleypur 100 m á 15 sek. getur náð fyrsta sæti á meðan sá sem hleypur á 13 sek. nær 5 sæti. Allt er þetta háð því í hvaða flokki hver og einn lendir.

Þetta kerfi er ekki fullkomið og það er að sjálfsögðu mun erfiðara að meta frammistöðu í borðtennis, boccia, knattspyrnu og badminton en í greinum þar sem tímataka fer fram s.s. í sundi og frjálsum íþróttum. 

Reglur hafa verið settar til að vinna gegn því að svindl eigi sér stað en þjálfarar eiga að geta  metið ef keppendur eru ekki að gera sitt besta í undankeppni.  Sé meira en 15% munur á árangri í undankeppni og úrslitum er einstaklingur dæmdur úr keppni.