Bjarki og Dagbjört Íþróttafólk Völsungs 2018

Bjarki og Dagbjört Íþróttafólk Völsungs 2018.

Á Íþróttafólki Völsungs sem fór fram við hátíðlega athöfn í Miðhvammi voru Bjarki Baldvinsson og Dagbjört Ingvarsdóttir kjörin íþróttafólk Völsungs fyrir árið 2018.

Alls bárust sjö tilnefningar frá fjórum deildum.

Þeir sem voru tilnefndir til Íþróttafólks Völsungs voru Bjarki Baldvinsson (knattspyrnumaður 2018), Dagbjört Ingvarsdóttir (knattspyrnukona 2018), Þórunn Harðardóttir (blakkona 2018), Arnar Guðmundsson (blakmaður 2018), Jóna Rún Skarphéðinsdóttir (Bocciakona 2018), Ásgrímur Sigurðsson(Bocciamaður 2018) og Heiðar Hrafn Halldórsson (langhlaupari 2018).

Það var síðan valnefnd sem er samsett af fulltrúum úr aðlstjórn ásamt fulltrúum deilda sem kusu um íþróttafólk Völsungs. Að þessu sinni var Bjarki Baldvinsson kjörinn íþróttamaður Völsungs og Dagbjört Ingvarsdóttir kjörin íþróttakona Völsungs.

Bjarki Baldvinsson - Íþróttamaður Völsungs 2018

Meistaraflokkur karla náði góðum árangri í sumar er liðið hafnaði í fjórða sæti með 40 stig og voru í toppbaráttunni frá upphafi til enda. Bjarki Baldvinsson var fyrirliði liðsins og fór fyrir sínu liði með góðri spilamennsku. Lagði upp mörk fyrir félaga sína ásamt því að skora 5 sjálfur í 23 leikjum sínum í deild og bikarkeppni. Bjarki vakti ekki bara athygli hjá Völsungum og stuðningsfólki því hann var valinn í lið ársins á Fotbolti.net. Þar að auki náði hann þeim merka áfanga að leika sinn 200. leik fyrir Völsung í deild og bikar.

Bjarki er leiðtogi innan og utan vallar og leggur mikið á sig til að bæta stöðugt leik sinn og lyfta þannig liði sínu á næsta stig. Góð fyrirmynd fyrir yngri leikmenn sem vilja bæta sig og ná lengra.

Dagbjört Ingvarsdóttir - Íþróttakona Völsungs 2018

Dagbjört  er 22 ára og hefur spilað með Völsungi allan sinn feril.  Hún hefur spilað 94 leiki með meistaraflokki og skorað 13 mörk. Dagbjört er kraftmikill leikmaður. Hún er með mjög góðan leikskilning og mikinn metnað bæði á æfingum og í leikjum.  Hún er lykilmaður í Völsungsliðinu og getur spilað bæði sem miðjumaður og í vörn. Síðastliðið sumar spilaði hún sem aftasti maður og stjórnaði vörn liðsins. Liðið endaði endaði í 5. sæti  á íslandsmótinu í 2. deild kvenna.

Á lokahófi meistaraflokkanna s.l. haust völdu leikmenn  Dagbjörtu besta leikmann sumarsins  þriðja árið í röð.

Á myndinni eru þeir sem hlutu tilnefningar til Íþróttafólks Völsungs að undanskildum Arnari Guðmundssyni sem átti ekki heimagengt að þessu sinni.

Með því að smella á myndirnar má sjá þær stærri.