Aukinn stuðningur Norðurþings við Björgunarsveitina Garðar

27. feb

Aukinn stuðningur Norðurþings við Björgunarsveitina Garðar
Almennt - - Lestrar 242

Kristján Þór og Júlíus að lokinni undirskrift.

Í upphafi aðalfundar Björgunar-sveitarinnar Garðars í gærkveldi skrifuðu Júlíus Stefánsson for-maður sveitarinnar og Kristján Þór Magnússon sveitarstjóri Norðurþings undir samning um áframhaldandi og aukinn stuðning sveitarfélagsins við björgunarsveitina.

Samningurinn byggir á eldri samningum og mun sveitin m.a. sinna áfram umsjón með ártali í Húsavíkurfjalli ásamt umsjón með sauðfjárgirðingum í landi Húsavíkur.

Nýmæli er að í samningnum er lagt fram fé sem sértaklega er ætlað til unglingastarfs sem fram fer í unglingadeildinni Náttfara. Mikið og öflugt starf hefur verið rekið þar mörg undanfarin ár og fjöldi unglinga sem eru virkir í starfinu hefur aukist. Nýliðun í Björgunarsveitini er að talsverðum hluta komið úr unglingadeildinni.

"Þessi samningur stuðlar að festu í rekstrinum hjá okkur" sagði Júlíus Stefánsson formaður og bætti við "það er þungur róður að reka félag sem þetta en með góðvild íbúa og rekstraraðila á svæðinu, sjálfboðavinnu félagsmanna sem og með öflugum stuðningi sveitarfélagsins og Kiwanisklúbbsins Skjálfanda þá gengur þetta".

Sitjandi stjórn var endurkjörin en Almar Eggertsson kemur nýr inn í stjórn í stað Þóris Gunnarssonar sem ekki gaf kost á sér.

Stjórn sveitarinnar skipa: Júlíus Stefánsson formaður, Ástþór Stefánsson varaformaður, Almar Eggertsson ritari, Friðrik Sigurðsson gjaldkeri og meðstjórnendur eru Tryggvi Berg Friðriksson og Gunnar Sigurður Jósteinsson.

Sveitarstjóri ávarpar aðalfundinn