Að vera í björgunarsveit!

Friðrik Sigurðsson.

Ég hef verið þeirrar ánægju aðnjótandi að fá að starfa með því frábæra fólki sem sinnir útköllum hvenær sem er sólahringsins alla daga ársins, það er skemmst frá því að segja að þetta fólk er allt saman snillingar upp til hópa.

Ég var tvístígandi þegar kallað var eftir fólki til að ganga í björgunarsveitina því ég er ekki mikill tækjamaður, fer sjaldan á sjó og enn sjaldnar til fjalla en það fannst hlutverk fyrir mig við skrifborðið og þar hef ég lagt mitt af mörkum til að sveitin vaxi og dafni.

Ertu þú með?

Ég hef komist að því þann tíma sem ég hef starfað í björgunarsveitinni Garðari að það er pláss fyrir alla þá sem áhuga hafa á þessu sjálfboðaliðsstarfi og hægt að finna öllum hlutverk við hæfi.    Hefur þú lesandi góður hugleitt það að gefa af þínum tíma í þetta frábæra starf?  Það eru engin félagsgjöld og ánægjan er mikil hjá þeim sem taka þátt í starfinu.

Unglingadeildin Náttfari

Ein öflugasta deildin innan björgunarsveitarinnar Garðars er unglingadeildin Náttfari þar sem fram fer frábært uppbyggingar- og fræðslustarf fyrir unglingana okkar sem er bæði bætandi og fræðandi fyrir þau.  Hefur þú hvatt þinn ungling til að taka þátt í þessu starfi?  Hér gildir það sama og í björgunarsveitinni sjálfri, það eru engin þáttökugjöld.  

Fimmtudagskvöld!

Ef þig eða unglingnum þínum langar til að taka þátt í starfinu er bara að kíkja í Naust á fimmtudagskvöldum því það er alltaf eitthvað um að vera í húsinu á þeim kvöldum, þar er tekið vel á móti öllum sem vilja kynna sér starfið og ef til vill taka þátt í framhaldinu.

En kostar þetta ekki eittthvað að reka björgunarsveit?

Vissulega kostar rekstur björgunarsveitar mikla peninga en þeim er aflað á margvíslegan máta, t.d. með dósasöfnun og ýmsum verkefnum sem félagsmenn taka að sér í sjálfboðavinnu sem skila sveitinni tekjum.  Nýverið var gerður nýr samningur við Norðurþing um aukin stuðning við sveitinna sem gerir henni kleyft að halda úti enn öflugra unglingastarfi ásamt því að tryggja rekstur sveitarinnar næstu misseri.   Aðal bakhjarl Garðars við tækjakaup hefur um langt árabil verið Kiwanisklúbburinn Skjálfandi sem hefur keypt fyrir sveitina hvert tækið af öðru og með því stuðlað að því að hér sé nægjanlegur slagkraftur til að takast á við fjölbreytt útkallsverkefni.  Garðar og Skjálfandi hafa átt sérstaklega gott samstarf um flugeldasölu á Húsavík svo lengi sem ég man eftir mér.

Styrkir skipta sköpum! 

Einstaklingar og fyrirtæki hafa einnig verið mjög dugleg að styrkja sveitina bæði með fjárframlögum, vinnuframlögum við húsnæði félagsins og nú nýverið gaf Guðmundur H. Halldórsson málarameistari allt efni og tilheyrandi á alla neðri hæð húsnæðis sveitarinnar í Nausti.  Adam Jónsson frá Tóvegg arfleiddi sveitina að hárri peningafjárhæð sem nýttist til að kaupa notaðan bát fyrir sveitina.  

Fjölmörg fyrirtæki studdu einnig við bakið á sveitinni þegar klárað var að byggja sunnan við Naust og kann ég þeim öllum bestu þakkir fyrir veittan stuðning.

Framtíðin

Framtíð björgunarsveitarinnar Garðars er björt, öflugur hópur starfar þar og búast má við talsverðri nýliðun í sveitinni haldi unglingadeildin áfram því öfluga starfi sem þar er í gangi næstu misseri.

Áframhaldandi stuðningur einstaklinga og fyrirtækja er og verður lykilinn af því að sveitin vaxi enn frekar og dafni.

Kíktu við í Nausti ef þú vilt vera með í starfinu!

Hafðu bestu þakkir fyrir lesturinn.

Friðrik Sigurðsson gjaldkeri björgunarsveitarinnar Garðars á Húsavík.