Umfjöllun: Auðveldur Mærusigur stúlknanna

Völsungsstúlkur fagna marki!

Völsungsstúlkur tóku á móti Keflavík í bongóblíðu á Mæruföstudegi þetta árið. Þær grænu ætluðu að rífa sig upp eftir stórt tap gegn KR í síðustu umferð og frá fyrstu mínútu mátti sjá að það myndi takast. Anna Jónína Valgeirsdóttir, markvörður, hefur flust til útlanda og hefur Anna Guðrún Sveinsdóttir verið kölluð til baka úr láni hjá Haukum. Hún spilaði því sinn fyrsta Völsungsleik þetta sumarið á Mærunni.

Byrjunarlið Völsungs: Anna Guðrún Sveinsdóttir, Anna Halldóra Ágústsdóttir, Jóney Ósk Sigurjónsdóttir(Elma Rún Þráinsdóttir’70), Elva Mary Baldursdóttir, Ásrún Ósk Einarsdóttir, Harpa Ásgeirsdóttir(Sigrún Vala Hauksdóttir’80), Berglind Ósk Kristjánsdóttir, Helga Björk Heiðarsdóttir(Þórunn Birna Jónsdóttir’53), Hulda Ósk Jónsdóttir, Ruth Ragnarsdóttir(Sigrún Lilja Sigurgeirsdóttir’76), Laufey Elísa Hlynsdóttir.

Völsungsstúlkur mættu grimmar til leiks og uppskáru mark eftir aðeins fimm mínútna leik. Hulda Ósk óð þá upp hægri kantinn, lék á tvo varnarmenn og gaf fyrir þar sem Berglind Ósk kom askvaðandi og kláraði í fyrstu snertingu. Laglegt mark og laglegur undirbúningur og staðan orðin 1-0.

Stelpurnar voru ekki eins grimmar í teig andstæðinganna eftir þetta en Helga Björk átti þó tvö ágætis skot sem voru varin og einnig var varið vel frá Laufey Elísu af stuttu færi.

Lítil hætta skapaðist á okkar eigin vallarhelmingi og minnist ég þess ekki að Anna Guðrún hafi þurft að verja skot, þótt einstaka sendingar til baka hafi ratað á hana.

Forystan varð svo 2-0 á 32.mínútu en Ásrún Ósk tók þá hornspyrnu á fjærstöng sem Helga Björk skaut til baka í fjærhornið. Fastur bolti í jörðina sem fleytti eina kellingu á vellinum áður en hann endaði í markinu, fallegt mark.

Hálfleikstölur því 2-0 og öruggt að segja að þær tölur væru alls ekki of litlar. Völsungsstúlkur slökuðu aðeins á klónni í seinni hálfleik og sköpuðu sér ekki eins mörg færi en aldrei var hætta á því að þær myndu missa leikinn niður.

Á 64.mínútu kom svo fallegasta mark leiksins. Hulda Ósk fékk þá boltann um 35 metra frá marki, lék á þrjá varnarmenn og komst inn í vítateig þar sem hún átti fast skot efst upp í markhornið nær. 3-0 og leikurinn alveg niðurnegldur.

Leikurinn fjaraði út, Völsungur nýtti allar sínar skiptingar og riðlaði skipulaginu aðeins en hélt áfram að sækja. Auðveldur 3-0 sigur því staðreynd á Mærudögum!

Stelpurnar áttu aldrei í vandræðum í leiknum og spiluðu þetta skynsamlega. Vörnin stóð sína plikt og aðrar líka þótt miðjan hafi átt í smá basli um miðjan fyrri hálfleikinn. Hulda Ósk skaraði þó fram úr í sóknaraðgerðum sínum og var valin Nivea-stúlka leiksins í kjölfarið. 

Ágætis leikjapása framundan hjá stelpunum en næsti leikur stúlknanna er þriðjudaginn 13.ágúst en þá kemur Höttur í heimsókn. Fyrri leik liðanna lauk með 1-1 jafntefli og það er vonandi að stelpurnar ætli sér að hefna fyrir það.